विराटनगर, १६ माघ । मोरङको धनपालथान गाउँपालिकास्थित उखुबारीमा गाडीएको अवस्थामा शव फेला परेका दुई पुरुषको पहिचान खुलेको छ । मोरङको धनपालथान गाउँपालिका-७ बोर्डीङ टोलस्थित उखुबारीमा खाल्डो खनेर गाडेको अवस्थामा दुई जनाको शव फेला परेको थियो ।

मृतकमध्ये एक जना सुनसरीको धरान-३  का ४९ वर्षीय राजेन्द्र कुमार श्रेष्ठ र अर्का सप्तरीको शम्भुनाथ नगरपालिका-४ का ३२ वर्षीय शम्भु चौधरी रहेको जिल्ला प्रहरी कार्यालय मोरङका प्रमुख प्रहरी उपरीक्षक जनाद्र्धन जीसीले जानकारी दिए ।

गत बुधबार उखु काट्ने क्रममा स्थानीयले शंकास्पद खाल्डो भेटाएर प्रहरीलाई खबर गरेपछि खनेर हेर्दा कपडासहित गाडेको अवस्थामा सडेगलेको शव भेटिएको थियो । सोही खाल्डो नजिकै अर्को खाल्डो देखिएपछि बिहीबार मोरङका प्रहरी प्रमुख प्रहरी उपरीक्षक जीसीसहितको टोलीले खाल्डो खनेर हेर्दा अर्को शव भेटिएको थियो ।