विराटनगर, २० मंसिर । नेपाली कांग्रेस प्रदेश १ को सभापतिमा पराजित भएका नेता गुरुराज घिमिरेले पार्टीको आन्तरिक प्रतिष्पर्धामा राज्यशक्तिको हदैसम्म दुरुपयोग भएको आरोप लगाएका छन् ।

सोमबार विराटनगरमा सञ्चारकर्मीहरुसँग कुरा गर्दै नेता घिमिरेले पार्टीको आन्तरिक प्रतिष्पर्धामा आफूविरुद्ध सरकारी शक्ति प्रयोग भएको दावी गरे । ‘पार्टीको आन्तरिक लोकतान्त्रीक प्रतिष्पर्धामा राज्यशक्तिको हदैसम्मको दुरुपयोग भएको छ ।’ उनले भने,‘म सरकारी प्रकोपमा परें ।’

घिमिरेले दुई मत मात्र कम देखिएको र त्यसमा आफ्नो चित्त नबुझेकाले पुनः मतगणनाका लागि माग गरेको स्पष्ट पारे । उनले मतगणनामा कमि–कमजोरी भएको हुनसक्ने भएकाले पुनः मतगणनाको माग गरेको र त्यसपछि आउने परिणाम सहजै स्वीकार गर्ने बताए ।

प्रदेश अधिवेशन अन्तर्गत सोमबार विहान सम्पन्न अन्तिम मतमरिणाम अनुसार घिमिरे सभापति पदमा उद्धव थापासँग दुई मतले पराजित भएका थिए । मत परिणाम अनुसार थापाले ८४४ मत प्राप्त गरे भने घिमिरेले ८४२ मत ल्याएका छन् ।

घिमिरे संस्थापन इतर पौडेल–कोइराला पक्षका हुन भने थापालाई देउवा–सिटौलाको समर्थन थियो । मतपरिणाम प्रति असन्तुष्ट जनाउदै घिमिरेले पुनः मत गणनाका लागि निवेदन दिएका छन् ।