काठमाडौं, ८ भदौ । नेकपा एकीकृत समाजवादीका अध्यक्ष माधव कुमार नेपालले अष्टलक्ष्मी शाक्य आफूसँगै सल्लाह गरेरै मुख्यमन्त्री बनेको दाबी गरेका छन् ।

मंगलबार चन्द्रागिरि रिसोर्टमा आयोजित पत्रकार सम्मेलनमा नेपालले आफूसँगै सल्लाह गरेरै शाक्य बागमती प्रदेशको मुख्यमन्त्री बनेको बताएका हुन् ।

‘उहाँले अब २१ दिनभित्र पार्टी खुलाउनुपर्ने हुन्छ । अहिले उहाँ पनि अप्ठ्यारो हुनुहुन्छ । उहाँ मसँगै सल्लाह गरेर मुख्यमन्त्री हुनुभएको हो,’ नेपालले भने ।

शाक्यले अब लिने निर्णयका आधारमा उनी नेतृत्वको सरकारको भविष्य निर्धारण हुने नेपालको भनाइ छ । नेपाल पक्षले दल दर्ताको प्रक्रिया अघि बढाउँदै गर्दा शाक्य बागमतीको मुख्यमन्त्री बनेकी थिइन् । पार्टी विभाजनमा शाक्यले नेता नेपाललाई साथ दिएकी थिइनन् ।

सोमबार बालकोट अध्यक्ष ओलीसँग भएको वार्तामा मुख्यमन्त्री शाक्यले एमालेमै रहने बताएकी छिन् ।