एजेन्सी, १ भदौ । उज्वेकिस्तानले अफगानिस्तानको एक सैन्य विमान खसालेको छ । उज्वेकिस्तानको रक्षा मन्त्रालयले सीमा उल्लंघन गरेको अफगान सैन्य विमानलाई खसालेको जनाएको हो ।

उक्त विमानमा कति सवार थिए र उनीहरूको अवस्था कस्तो छ भन्ने बारेमा केही नखुलाइएको बीबीसीले जनाएको छ । त्यस्तै सीमा पार गरेको आरोपमा ८४ अफगान सैन्य अधिकारीहरूलाई पक्राउ गरिएको उज्वेकिस्तानले जनाएको समाचारमा उल्लेख छ ।

तालिबानले अफगानिस्तान कब्जा गरेसँगै ठूलो सङ्ख्यामा मानिसहरू विदेश जाने प्रयासमा छन् । त्यसक्रममा विमानस्थलहरूमा ठूलो भीड लागेको छ ।

विमानस्थलमा ठूलो भीड जम्मा भएपछि तितरबितर पार्न सोमबार अमेरिकी सैनिकले गोली चलाएको थियो । त्यस्तै जबर्जस्ती विदेशिन खोज्ने केही जहाजबाट खसेका दृष्यहरू पनि सामाजिक सञ्जालमा अपलोड भएका थिए ।