विराटनगर, ८ चैत । ४० वर्षदेखि भारतको जेलमा सुनुवाइको मौकासमेत नपाई थुनामा परेका इलामका दुर्गाप्रसाद तिम्सिना आज बिहान नेपाल आइपुगेका छन् ।

तिम्सिनालाई कोलाकाताको उच्च अदालतले शनिबार रिहाइ गरिदिएपछी उहाँ आफन्तका साथ नेपाल आएका हुन् । आज बिहान परिवार, पत्रकार र कोलकत्तास्थित महावाणिज्य दुतावास कार्यालयका प्रतिनिधिका साथ बिश्व सेवा बिस्तार संस्थाको पहलमा उहाँ काकडभिट्टा हुदै स्वदेश फर्किएका हुन् ।

स्वदेश आएलगतै झापामा पत्रकार सम्मेलन गरेर दुर्गालाई परिवारको जिम्मा लगाईएको र उहाँलाई इलाम माई नगरपालिका–१० स्थित घर लगिएकोे बिश्व सेवा बिस्तार संस्थाले जनाएको छ ।

भारत पश्चिम बंगालको दमदम करेक्सनल सेन्टर मा रहेका तिम्सिना कोलकाता उच्च अदालतको आदेश बमोजिम शनिबार छुटेका हुन् । शारीरिक र मानसिक रुपमा कमजोर उनलाई लिन भाइ प्रकाशचन्द्र दमदम जेल पुगेका थिए ।

अदालत र प्रकाशचन्द्रबीचको सम्झौतासहितको पत्र शुक्रबार अपरान्ह अदालतले जेल पठाएको थियो । त्यही पत्रका आधारमा जेल प्रशासनले उनलाई छाडेको हो ।

अदालतले उनको दिमागी हालत ठीक नभएको भन्दै घरमै राखेर उपचार गर्नसमेत आदेश गरेको छ । क्षतिपूर्तिका सन्दर्भमा भने अदालत मौन छ । दुर्गाप्रसादका पक्षमा बहस गरेका वकिल हिरक सिन्हाका अनुसार हरेक ६÷६ महिनामा उनको मानसिक अवस्थाबारे कोलकातास्थित नेपाली महावाणिज्य दूतावासलाई जानकारी गराउनुपर्नेछ  । त्यसपछि महावाणिज्य दूतावासले अदालतलाई जानकारी गराउनेछ  ।