विराटनगर, ५ चैत । प्रदेश–१ को राजधानी विराटनगरमा पहिलोपल्ट रात्रिकालीन फुटबल प्रतियोगिता विराट गोल्डकप हुने भएको छ । यही २६ चैतको साँझ ७ बजेदेखि विराटनगरको शहीद रंगशालामा रात्रिकालीन विराट गोल्डकप फुटबल प्रतियोगिता हुने भएको हो ।

बिहीबार विराटनगरमा पत्रकार सम्मलेन गर्दै आयोजक समितिले प्रदेश सरकारको लगानीमा शहीद रंगशालामा र्फ्ल्डलाइट जडानको कार्य सम्पन्न भएसँगै रात्रीकालीन गोल्डकपको आयोजना गर्न लागिएको जनाएको छ । गोल्डकप २६ चैतदेखि सुरु भएर ४ वैशाखमा समापन हुने पत्रकार सम्मेलनमा जानकारी दिइएको थियो ।

गोल्डकपमा नेपाल, भारत र क्यामरुनबाट गरी कुल १० वटा टीमको सहभागिता हुनेछ । आउँदो विराट गोल्डकपमा स्थानीय, राष्ट्रिय र अन्तर्राष्ट्रियस्तरका खेलाडी पनि सहभागी गराउने उद्देश्यले यसपटक विराटनगर–११ बाट पनि टिम तयार भइरहेको आयोजक समितिले जनाएको छ ।

यसका लागि लाग्ने सम्पूर्ण खर्चको व्यवस्थापन विराटनगर महानगरपालिकाले गरेको विराट गोल्डकप फुटबल ट्रष्ट आयोजक समिति विराटनगरका संयोजक मनोजविक्रम शाहले जानकारी दिए ।

एन्फाको नियमानुसार सञ्चालन हुने खेलमा विजेता टिमलाई १५ लाख १५ हजार र उपविजेतालाई ७ लाख ५१ हजार नगद पुरस्कारको व्यवस्था गरिएको आयोजक समितिले जनाएको छ । ‘म्यान अफ द म्याच’ हुने खेलाडीलाई पनि प्रत्येक म्याचमा १५ हजार नगद पुरस्कारको व्यवस्था मिलाइएको आयोजक समितिले जानकारी दिएको छ ।

त्यस्तै प्रतियोगिताको सर्वोत्कृट खेलाडीलाई मोटरसाइकलसहित पदक प्रदान गर्ने योजना तय भएको आयोजक समितिका संयोजक शाहले बताए । उनले प्रशिक्षक, गोलकिपर, मिड फिल्डर, डिफेन्स, फरवार्ड, सर्वाधिक गोलकर्ता र व्यवस्थापकसमेतलाई २५–२५ हजार नगर पुरस्कार प्रदान गरिने जानकारी दिए ।