प्रधानमन्त्री केपी ओलीविरुद्ध संघर्षमा सँगै उभिएका पुष्पकमल दाहाल प्रचण्ड र माधवकुमार नेपाल छुट्टिएका छन् । सर्वोच्च अदालतले एमाले र माओवादी केन्द्र ब्युँतिएको निर्णय गरेसँगै प्रचण्ड र नेपाल अलग्गिएका हुन् । २४ फागुनमा पेरिसडाँडामा स्थायी कमिटी बैठक राखेर उनीहरूले पूर्ववत् अवस्थामा अघि बढ्ने सहमति गरे ।

२३ पुस ०७६ मा बामदेव गौतमको निवासमा नेकपा अध्यक्ष ओलीविरुद्ध प्रचण्ड, माधव नेपाल, झलनाथ खनाल, विष्णु पौडेल र नारायणकाजी श्रेष्ठसहितको गठबन्धन बन्यो । र, सभामुखमा अग्नि सापकोटालाई निर्वाचित गर्ने यो समूहले निर्णय गर्‍याे ।

त्यसयता प्रचण्ड-माधव नेपालको सम्बन्ध बढ्ता हार्दिक बन्न थालेको हो । त्यसैकारण १७-१९ माघको केन्द्रीय कमिटीका बैठकमा पनि यो समूह एक भएको थियो । र, ओलीविरुद्ध निर्णय लिन सफल भएका थिए । ओलीको अनिच्छाबीच अमेरिकी परियोजना एमसीसीसम्बन्धी अध्ययन कार्यदलसमेत बन्यो । २३ पुसदेखि जारी प्रचण्ड-माधव सम्बन्धले ७ वैशाख ०७७ मा केपी ओलीले राजनीतिक दलसम्बन्धी अध्यादेशले झनै घनिष्ठता बढायो ।

हुनलाई अध्यादेश ल्याउनुअघिसम्म ओलीले प्रचण्ड र माधव नेपाललाई छुट्टाछुट्टै भेटेर प्रधानमन्त्री र अध्यक्ष पदको आश्वासन दिइरहेका थिए । त्यसैले वैशाख ०७७ मा प्रचण्ड ओलीविरुद्ध आक्रामक भएका बेला माधव नेपाल मध्यधारमा उभिन्थे पनि । त्यतिबेला प्रचण्डलाई भावनात्मक रुपमा नबहकिन र ओलीलाई निरंकुश शैली नअपनाउन भन्दै एक विज्ञप्ति पनि निकालेका थिए । त्यसैले माधव प्रचण्डसँग पुरै एकगठ चाहिँ भइसकेका थिएनन् ।

तर, जब १० असार ०७७ मा विवादका बीच स्थायी कमिटी बैठक बस्यो र बामदेव गौतमलाई प्रधानमन्त्री बनाउने ओलीको प्रस्ताव आयो । र, ओली नेपालविरुद्ध खनिन थाले त्यसपछि प्रचण्डसँगको सम्बन्ध विस्तार भएको हो । त्यसपछि निरन्तर प्रचण्ड-माधवको सम्बन्ध विस्तार भयो । ओलीकै शब्दमा ५ पुस ०७७ भन्दाअघि प्रचण्ड र माधव नेपालबीच खुमलटारमा १२३ वटा वैठक भए । ती सबै बैठक आफूविरुद्ध थिए भन्ने ओलीको जिकिर छ ।

ओलीसँग नेपालको सम्बन्ध यति तिक्ततापूर्ण भयो कि १० असारपछि एकैचोटी असोजमात्रै नेपाल र ओलीबीच बोलचाल भएको थियो । माधव-प्रचण्डसँग नजिकिएको नाममा ओलीसँग नेपालको सम्बन्ध बिग्रिँदो क्रममा थियो ।

त्यसै कारण ओली र नेपालको संवाद पनि महिनौ दिन हुन सकेन । तर, जब ५ पुसमा संसद् विघटन गर्ने निर्णयमा ओली पुगे । त्यसपछि त झनै ओली नेपाल सम्बन्ध तिक्त बन्यो र प्रचण्ड-माधव सम्बन्ध घनिष्ठ बन्यो । प्रचण्ड-माधव समूहको ६ पुसको केन्द्रीय कमिटी बैठकले नेपाललाई अध्यक्ष चयन गर्‍यो । डेढ वर्षअघि २३ पुस ०७५ देखि घनिष्ट सम्बन्धमा गाँसिएका प्रचण्ड र नेपालको २४ फागुन ०७७ मा डिभोर्स भएको छ ।

नलाई नेपाल र प्रचण्डको सम्बन्ध ३५ वर्षभन्दा लामो हो । तर, ती सबै सम्बन्ध अलग पार्टीको रुपमा थिए । तर, पार्टी एकतापछिका डेढ वर्षको हार्दिक सम्बन्ध चाहिँ निरस विछोडमा टुंगिएको छ । भलै २३ फागुन ०७७ मा सर्वोच्च अदालतले नेकपा एकता बदर गरेपछि प्रचण्ड-माधव सम्बन्ध तिक्ततापूर्ण भन्दा पनि सहमतिमै विछोड भएको हो ।