विराटनगर, २६ भदौ–कारोना भाइरसको संक्रमणबाट प्रदेश १ मा शुक्रबार दुई जनाको मृत्यु भएको छ । सुनसरीको धरानस्थित वीपि कोइराला स्वास्थ्य विज्ञान प्रतिष्ठानमा एक पुरुष र मा विराटनगरस्थित कोशी अस्पताल कोभिड–१९ उपचार केन्द्रमा एक महिलाको मृत्यु भएको हो ।

वीपी कोइराला स्वास्स्थ्य विज्ञान प्रतिष्ठानमा सुनसरीको रामधुनी–५ झुम्काका ४३ वर्षिय पुरुषको उपचारका क्रममा निधन भएको हो । एक वर्षदेखि झुम्का कारागारमा रहेका मृतक पुरुषमा १० दिनदेखि ज्वरो आएको र दुई दिनदेखि खोकी तथा स्वास प्रश्वासमा समस्या भएपछि उपचारका लागि जिल्ला अस्पताल इनरुवाबाट रेफर गरि वीपी कोइराला स्वास्थ्य विज्ञान प्रतिष्ठानमा शुक्रबार बिहान ११.५४ मा ल्याइएको थियो।

उनलाई तत्काल इमेरजेन्सीमा भर्ना गरि सुरु गरिएकोमा उपचारका क्रममा ४.३० बजे मृत्यु भएको प्रतिष्ठानका प्रवक्ता डा. निदेश सापकोटाले जानकारी दिए । उनका अनुसार मृतक पुरुषको शुक्रबारनै कोरोना रिपोर्ट पोजेटिभ आएको थियो । मृतकमा कुनैपनि दिर्घरोग नरहेको प्रतिष्ठानले जनाएको छ । मृतकको शव नियमअनुसार व्यवस्थापन कार्य भइरहेको प्रवक्ता डा. सापकोटाले जानकारी दिए ।

त्यस्तै विराटनगरस्थित कोशी अस्पताल कोभिड–१९ उपचार केन्द्रमा मोरङको ग्रामथान गाउँपालिका–२ की ७० वर्षीया कोरोना संक्रमित महिलाको उपचारका क्रममा ४ः३० मा मृत्यु भएको छ ।

उपचार केन्द्रका प्रमुख डा. दिपक सिग्देलका अनुसार वृद्धामा बिहीबार कोरोना संक्रमण पुष्टि भएको थियो । सोही दिन राति स्वास्थ्यमा समस्या थपिएपछि उनलाई कोशी अस्पताल हुँदै कोभिड उपचार केन्द्रमा भर्ना गरिएको थियो ।