विराटनगर, ८ भदा–खेतमा लगाएका धानबालीमा गवारो लागेपछि किसान चिन्तित बनेका छन् । गवारोका कारण पोटा लाग्ने धानको गुवो काट्न थालेपछि किसान चिन्तित बनेका हुन् । धेरै मेहनत र लागत लगाएर किसानले लगाएको धानबालीमा गुवो काटिएको देखेपछि उनीहरुको मनमा चिसो पसेको पाइन्छ ।

यो समस्या सुनसरी, मोरङ र झापाका किसानहरुले बढि भोगिरहेका छन् । धानमा केही स्थानमा डडुवा रोगले पनि सताइरहेको किसानको गुनासो आइरहेको कृषि विकास निर्देशनालय विराटनगरले जनाएको छ । समयमै खेती गर्न भ्याएका किसानहरुले यस किसिमको रोग र किराबाट बाली सखाप हुने पीरमा डुबेका छन् ।

सुनसरी चाँदबेलाका किसान देबनारायण चौधरीले आफ्ना खेतमा गुवो काटिएको देखिपछि कुन विषादी प्रयोग गर्ने सल्लाह र सुभाव लिन बन्दाबन्दी तथा निषेधाज्ञाले पनि उनलाई समस्या बनाएको छ । यो समस्या एक प्रतिनिधिमूलक मात्र हो यस्ता हजारौँ किसानहरु धानको उपचार नपाएर भौतारी रहेका छन् ।

गवारो माउ पुतली र फुलको थुप्रापहरु पहिचान गरी नष्ट गर्नु पर्ने, प्रकाश÷उज्यालोको पासो थापेर माउ पुतली नष्ट गर्नु पर्ने, फेरोमोन ल्युपर नामक विषादी प्रयोग गर्नु पर्ने, ट्राकोग्राम परजीवीहरुको प्रयोग गर्नु पर्ने र धान उत्पादन क्षेत्रको जैविक विविधता तथा कृषि पर्यावरण खलबलिन नदिने गरी रासायनिक विषादी प्रयोग गर्नुपर्ने सुझाव कृषि विकास अधिकृत मेघनाथ तिमिल्सिनाको छ ।

धानको गाँज बढिरहेको बेलामा गुवो खाइदिने समस्या भएपछि किसानहरु अहिले मर्माहत बनेका छन् । लामो सयम पछि यसवर्ष पूर्व क्षेत्रमा ९७ दशमलव ६८ प्रतिशत रोपाँई भएको कृषि विकास निर्देशनालयले जानकारी दियो ।

कार्यालय अनुसार गएको वर्षमा यस क्षेत्रमा ५६ दशमलव ७४ प्रतिशत अर्थात एक लाख ९३ हजार ३९८ हेक्टर जग्गामा मात्र धान लगाइएको थियो भने यसवर्ष तीन लाख ३२ हजार ९१७ हेक्टर जग्गामा धान खेती भएको निर्देशनालयका प्रवक्ता सरस्वती श्रेष्ठले बताइन् ।