उदयपुर, ६ वैशाख-उदयपुरको त्रियुगा नगरपालिकाका जनप्रतिनिधिलाई पनि क्वारेन्टाइनमा राख्नुपर्ने माग जनस्तरबाट उठेपछि जिल्ला प्रशासन कार्यालयमा यसबारे छलफल भइरहेको छ । अहिले त्रियुगा–११ बोक्सेस्थित जिल्ला प्रशासन कार्यालयमा मेयर बलदेव चौधरीसहितका जनप्रतिनिधि र जिल्लाका अधिकारीबीच छलफल भइरहेको हाे ।

स्रोतका अनुसार भुल्के मस्जिदमा कोरोना पुष्टि १२ जना भारतीय नागरिक जनप्रतिनिधिहरूसँगै कतिपय ठाउँमा राहत बाँड्न हिँडेका थिए ।‘त्यसैले नगरप्रमुखसहित केही जनप्रतिनिधि आफैं क्वारेन्टाइनमा बस्न खोज्नुभएको छ’, स्रोतले भन्यो, ‘अहिले निर्णय नै त भइसकेको छैन, सम्भवतः जनप्रतिनिधिलाई क्वारेन्टाइनमा राख्ने निर्णय हुनेछ ।’

त्रियुगाका नगरप्रमुख बलदेव चौधरीले अहिले आफू छलफलमा रहेको र केही बेरपछि निर्णयबारे बोल्ने बताए । ‘के गर्ने भन्ने विषयमा हामी अहिले छलफल गरिरहेका छौँ, छलफल सकिएपछि बोल्छु नि !’, उनले शिलापत्रलाई भने ।