एजेन्सी, साउन २५-लेबनानको राजधानी बेरुतस्थित बन्दरगाहमा भएको विस्फोटनका क्रममा १ सय ४१ फिट गहिरो खाडल बनेको अनुसन्धानकर्ताहरूले बताएका छन् ।

बन्दरगाहमा भण्डारण गरिएको एमोनियम नाइट्रेट नामको रसायन गत मंगलबार विस्फोट हुँदा १ सय ५० जनाभन्दा बढीको मृत्यु हुनुका साथै बन्दरगाह र त्यसवरपरका घरहरूमा व्यापक क्षति पुगेको थियो ।

अमेरिकी भूगर्भ इन्स्टिच्युटले विस्फोटबाट ३.३ म्याग्निच्युडको भूकम्पबराबरको धक्का महसुस गरिएको जनाएको छ । विस्फोटका कारण कम्तीमा ६ हजार मानिस घाइते हुनुका साथै घर भत्केका कारण ३ लाखभन्दा बढी मानिस विस्थापित भएका छन् । लेबनानको मुटुमा भएको यस विस्फोटको जिम्मेवारी उच्च राजनीतिक नेतृत्वले लिनुपर्ने माग गर्दै सरकारविरोधी प्रदर्शनहरू हुन थालेका छन् ।

बेरुत भन्सार तथा बन्दरगाहका साथै सुरक्षा निकायहरूले बन्दरगाहमा भण्डारण गरिएको रसायन जोखिमपूर्ण अवस्थामा रहेको भन्दै तत्काल निर्णय लिन मन्त्रिपरिषदमा समेत प्रस्तावहरू यसअघि पठाएका भए पनि सरकारले बेवास्ता गर्दा ठूलो जनधनको क्षति भएको आमनागरिकको आक्रोश छ ।

फ्रान्सेली अनुसन्धानकर्तासँग मिलेर कार्य गरिरहेका लेबनानी सुरक्षा अधिकारीले विस्फोट भएको स्थानमा झण्डै ४३ मिटर अर्थात् १ सय ४१ फिट गहिरो खाडल बनेको छ बताए ।

फ्रान्सले घटनाको अनुसन्धान एवं उद्धारका लागि ठूलो समूह लेबनानमा परिचालन गरिसकेको छ ।  साथै कतार, रसिया र जर्मनीका उद्धारकर्मीहरूसमेत बेरुतमा क्रियाशील छन् ।