कोरोना भाइरस सङ्क्रमण बढ्दै गएर समुदायस्तरमा संक्रमण देखिएन थालेपछि पूर्वाञ्चल विश्वविद्यालयका सम्पूर्ण परीक्षा स्थगित गरिएको छ। विश्वविद्यालयका सम्पूर्ण परीक्षा अनिश्चितकालका लागि स्थगित गरिएको परीक्षा नियन्त्रक प्रा.डा. सूर्यप्रसाद संग्रौलाद्वारा जारी सूचनामा भनिएको छ ।

विश्वविद्यालयले भदौदेखि गर्ने भनेको परीक्षा स्थगित गरेको हो । लकडाउन खुलेसँगै विश्वविद्यालयले भदौकाे पहिलो सातादेखि परीक्षा गर्ने कार्यतालिका प्रकाशित गरेको थियो।

कोरोना संक्रमणका कारण केही जिल्लामा सरकारले निषेधाज्ञासमेत जारी गरेको हुँदा अवस्था सामान्य नहुन्जेलसम्मका लागि परीक्षा स्थगित गरेको संग्रौलाले बताए ।

‘पछिल्ला केही दिनमा कोरोना संक्रमणको कारणले कतिपय जिल्लामा नेपाल सरकारले निषेधाज्ञासमेत जारी गरेको हुँदा यी सबै कुराहरूलाई मध्यनजर गर्दै अवस्था सामान्य भएपछि मात्र परीक्षाका तालिकाहरू प्रकाशित गरिने व्यहोरा सम्बन्धित सबैमा जानकारी गराइन्छ,’ जारी सूचनामा भनिएको छ ।

सरकारले लकडाउन खोलेपछि विश्वविद्यालयको परीक्षा व्यवस्थापन कार्यालयबाट भदौकाे पहिलो सातादेखि सम्बन्धित क्याम्पसमा परीक्षा केन्द्र कायम गर्ने गरी सूचना प्रकाशित गरेको थियो ।