विराटनगर, असार २९–प्रदेश १ प्रदेश सभाले प्रदेश प्रहरी सम्बन्धमा व्यवस्था गर्न बनेको विधेयक २०७७ संसोधनसहित सर्वसम्मत पारित गरेको छ । आजको प्रदेश सभा वैठकले प्रदेश प्रहरीको सम्बन्धमा व्यवस्थागर्न बनेको विधेयक सर्वसम्मतले पारित गरेको हो । प्रदेश सभाले विधेयक पारित गरेसँगै प्रदेश १ मा प्रदेश प्रहरी भर्नाको बाटो खुलेको छ ।

प्रदेश १ मा ११ हजार प्रहरी सहितको प्रदेश प्रहरी गठन गर्ने व्यवस्था प्रदेश प्रहरी सम्बन्धमा व्यवस्थागर्न बनेको विधेयक २०७७ ले गरेको छ । पहिलो चरणमा संघिय प्रहरी नै प्रदेशमा समायोजन भएर आउने भएकाले दोस्रो चरणमा मात्रै आबश्यकताका आधारमा प्रदेशमा प्रहरी भर्ना सुरू गर्ने प्रदेश सरकारको तयारी छ ।

प्रदेश प्रहरी सम्बन्धी विधेयकमा सांसदहरू लक्ष्मण तिवारी, विमल कार्की, शिव नारायण सिंह गनगाई लगायतका सांसदहरूले संसोधन प्रस्तावदर्ता गरेका थिए ।

केहि सांसदले राखेका संसोधन प्रस्तावलाई ग्रहण गर्ने र केहिलाई नियमावलीले सम्बोधनगर्ने आन्तरिक मामिला तथा कानुन मन्त्री हिक्मतकुमार कार्कीले आश्वासन दिए ।

आफूहरूले राखेका संसोधन प्रस्तावलाई आन्तरिक मामिला तथा कानुन मन्त्री कार्कीले आंशिक रुपमा स्वीकार गरेको र केहि प्रस्तावलाई नियमावलीमा समावेश गर्ने आश्वासन दिएकाले प्रस्ताव फिर्ता लिने सांसदहरूले घोषणा गरेका थिए ।

संसोधन प्रस्ताव सांसदहरूले फिर्ता लिएकाले प्रहरी सम्बन्धमा व्यवस्थागर्न बनेको विधेयक सर्वसम्मतले पारित भएको हो । ९४ दफा रहेको विधेयकमा एक पटक समावेशीको सुविधा पाएका प्रहरी कर्मचारीले पुनः सो सुविधा नपाउने व्यवस्था गरिएको छ ।