काठमाडौं, ६ असार-त्रिभुवन अन्तर्राष्ट्रिय विमानस्थलमा आज एकै दिन १६ उडान भएका छन् । अन्तर्राष्ट्रियतर्फ १० र आन्तरिकतर्फ ६ उडान भएको विमानस्थल कार्यालयले विज्ञप्तिमार्फत् जनाएको छ । शुक्रबार पनि अन्तर्राष्ट्रियतर्फ ९ र आन्तरिकतर्फ ५ गरी १५ उडान भएको थियो ।

विभिन्न मुलुकबाट अलपत्र नेपाली फर्काउन अहिले धमाधम चार्टर्ड उडान भइरहेको हो । आज मात्रै दुबैतर्फ गरी १६ उडान भएको विमानस्थलका महाप्रबन्धक देवेन्द्र केसीले बताए ।

उनका अनुसार नेपाल एयरलाइन्सले जापानको नारिताबाट २ सय ३६ यात्रु र ३ बालबालिका काठमाडौं ल्याएको छ । यस्तै, हिमालय एयरलाइन्सले बंगलादेशको ढाकाबाट चार्टर्ड उडानमार्फत् १ सय ५५ नेपाली काठमाडौं ल्याएको छ ।

कोरियन एयरले दक्षिण कोरियाबाट २ सय २८ नेपाल काठमाडौं ल्याएको छ । सोही एयरले नेपालबाट २ सय ३३ यात्रु बोकेर दक्षिण कोरियाको सिओल प्रस्थान गरेको छ ।

त्यस्तै, जजिरा एयरले कुवेतबाट १ सय ५० नेपाली ल्याएको छ । एयरअरेबियाले सारजहाबाट १ सय ६८ यात्रु र बच्चा ल्याएको छ । कतार एयरवेजले दोहाबाट कार्गो ल्याएको छ ।

नेपाली यात्रु लिन आजै नेपाल एयरलाइन्स मलेसियाको क्वालालम्पुर र हिमालय एयरलाइन्से ढाका प्रस्थान गरेको विमानस्थलले जनाएको छ ।

आन्तरिकतर्फ आज श्री एयर, सीता एयर, समिट एयर, तारा एयर, मनाङ एयर र सिम्रिक एयरको हेलिकोप्टरको उडानमध्ये समिट र ताराको लुक्ला र श्रीको बाग्लुङ उडान मौसम खराबीका कारण रद्द भएको जनाइएको छ । रासस