पोखरा, २९ जेठ-पोखरामा युवाले प्रधानमन्त्री केपी शर्मा ओलीविरुद्ध नाराबाजी भएको छ । लकडाउनको उल्लंघन गर्दै युवाले पोखराको राष्ट्र बैंक चोक र जिल्ला प्रशासन कार्यालय कास्कीको गेट अगाडि प्रदर्शन गरेका हुन् ।

लकडाउनको उल्लंघन गर्दै प्रदर्शन गर्ने युवालाई प्रहरीले लाठीचार्ज गरेको छ । ‘स्वतन्त्र पोखरेली’ को नाममा जिल्ला प्रशासन कार्यालय कास्की अगाडि भएको प्रदर्शनका क्रममा प्रहरीले लाठीचार्ज गरेको हो ।

बढ्दो कोरोना संक्रमणका बीच सरकारले नियन्त्रणमा प्रभावकारी कदम नचालेको तथा पीसीआरको दायरा नबढाएको भन्दै उनीहरूले प्रदर्शन गरेका थिए ।

प्रदर्शनका क्रममा युपाहरुले प्रधानमन्त्रीका कारण जनताले दु:ख पाएको, कोरोना महामारीको समयमा सरकारले काम नगरेको, व्यवसायीसँग कर लिन खोजेको, पीसीआर परीक्षणको दायरा नबढाएको लगायतका विभिन्न नारा लेखेको प्लेकार्डसहित नाराबाजी गरेका छन् ।

लकडाउन उलंघन गर्दै प्रदर्शन नगर्न प्रहरीले आग्रह गर्दागर्दै नमानेपछि लाठीचार्ज भएको प्रहरीले बताइएको छ । प्रदर्शनमा प्रहरीले हस्तक्षेप गरी केही युवालाई पक्राउ गरेको छ ।