हेटौंडा, १९ जेठ-हेटौँडाका व्यवसायीहरूले देशमा जारी लकडाउन स्वीकार्दै बस्नुको औचित्य समाप्त भएको भन्दै सरकारलाई चेतावनी दिएका छन् । मकवानपुर उद्योग वाणिज्य संघले हेटौँडाका व्यवसायीहरूको चर्को दबाबमा २१ जेठदेखि बजार खुलाउने निर्णय लिएको छ । संघले सोमबार पत्रकार सम्मेलन गर्दै सरकारले आफूहरूको आग्रहलाई बेवास्ता गरेको भन्दै बजार खुलाउने जानकारी दिएको हाे ।

संघका वरिष्ठ उपाध्यक्ष माधव न्यौपानेले पटक–पटक मकवानपुर प्रशासनलाई व्यवस्थित तवरबाट बजार खुलाउने अनुमति माग गरिए पनि सकारात्मक धारणा नआएको भन्दै संघले बाध्य भएर बजार खुलाउने निर्णय गर्नुपरेको बताए । ‘प्रशासनसमक्ष आग्रह गरियो तर, प्रशासनले संघीय सरकारकै अनुमति चाहिने भन्दै हामीलाई बेवास्ता गरिरह्यो, त्यसैले अब बजार खुल्छ’, न्यौपानेले भने ।

११ चैतदेखि जारी लकडाउनले व्यवसायीहरू चरम पीडामा परेको भन्दै सुरक्षा संवेदनशीलता अपनाएर बजार खुलाइने संघले जनाएको छ । ‘रोगले होइन, भोकले मर्ने स्थिति छ’ भन्दै मकवानपुर उद्योग वाणिज्य संघअन्तर्गत सबै वस्तुगत संघहरूले बजार खुलाउने तयारी गरेका हुन् ।