पोखरा, ४ वैशाख-आरडीटीमा शंकास्पद देखिएकी पोखराकी महिलाको कोरोना संक्रमण परीक्षणको नतिजा नेगेटिभ आएको छ । पोखरा महानगरपालिका–१२ ठिकालेथरकी ५५ वर्षीया महिलाको आरडीटी किटले परीक्षण गर्दा कोरोना पोजेटिभ देखिएको थियो ।

मंगलबार पोखरा महानगरपालिका–१० र १२ मा ३४ जनाको नमुना परीक्षणका क्रममा ति महिलामा कोरोना पोजेटिभ देखिएपछि पीसीआर प्रविधिबाट स्वाब परिक्षण थालिएको थियो ।

२७ दिन पहिले दुबईबाट पोखरा आएकी महिलाको स्वाब लिएर पीसीआर प्रविधिबाट परीक्षण गर्दा नतिजा नेगेटिभ देखिएको गण्डकी प्रदेश स्वास्थ्य निर्देशनालयले जनाएको छ ।

एक्लै घरमा बस्दे आएकी ति महिला दुबईमा छोरालाई भेटेर ८ चैतमा नेपाल फर्किएकी थिइन्। त्यस्तै, गण्डकी प्रदेशमा मंगलबार र्‍यापिड टेस्टका क्रममा ३ जनामा कोरोना एन्टीबडी पोजेटिभ देखिएको थियो । कास्की, बागलुङ र गोरखाका १/१ जनामा र्‍यापिड टेष्टमा पोजेटिभ देखिएपछि उनीहरुको पनि पीसीआर प्रविधिबाट परीक्षण गर्दा रिपोर्ट नेगेटिभ आएको निर्देशनालयले जनाएको छ ।