काठमाडौं, १४ जेठ-भेरी नदीमा हराइरहेकाको खोजी कार्यका १८ जनाको टोली परिचालन गरिएको छ । गोताखोरसहितको १८ जनाको टोली शनिबारदेखि हराइरहेका ३ जनाको खोजी कार्यका लागि परिचालन गरिएको हो ।

शनिबार पश्चिम रूकुमको चौरजहारीमा मल्ल थरकी केटीसँग विवाह गर्नका लागि जाजरकोटका नवराज विकसहित १९ जना गएकोमा ३ जना भेरी नदीको किनारमा मृत भेटिएका थिए भने अन्य ३ जना हराइरहेका थिए । उनीहरूको खोजीका लागि सशस्त्र प्रहरीको टोली परिचालन गरिएको हो ।

हराइरहेका व्यक्तिको खोजीका लागि सशस्त्र प्रहरी बलको जाजरकोटस्थित आश्रित गुल्मबाट सशस्त्र प्रहरी नायब उपरीक्षकको कमाण्डमा ४ जना गोताखोरसहित ११ जना र सशस्त्र प्रहरी बल नम्बर ४७ गुल्म पश्चिम रुकुमबाट सशस्त्र प्रहरी नायब निरीक्षकको कमाण्डमा ४ जना विपद् व्यवस्थापन तालिम प्राप्त सशस्त्र प्रहरीसहित १८ जनाको टोली  परिचालित भएको सशस्त्र प्रहरी सशस्त्र प्रहरी प्रधानकार्यालयले जनाएको छ।

शनिबार पश्चिम रूकुममा प्रेमिकासँग विवाह गर्न साथीसहित आएका जाजरकोट भेरी नगरपालिकाका नवराज विकसहित ३ जनाको केटी पक्षको आक्रमणबाट जोगिन नदीमा हामफाल्दा मृत्यु भएको छ । अन्य ३ जना बेपत्ता छन् भने १२ जना घाइते भएका छन् । उक्त घटनामा संलग्न रहेको आरोपमा चौरजहारी नगरपालिका–८ का वडाध्यक्ष डम्बर मल्लसहित स्थानीय १२ जनालाई प्रहरीले पक्राउ गरिएको छ ।