जनकपुर, ९ जेठ-सिरहाको नरहा गाउँपालिका–१ देविपुरमा राहत विषयमा झडप हुँदा डेढ दर्जन व्यक्ति घाइते भएका छन् । घाइतेमध्ये ३ जनालाई उपचारका लागि विराटनगर पठाइएको छ भने अन्यको सिरहा अस्पतालमा उपचार भइरहेको प्रहरीले जनाएको छ ।

घाइते हुनेमा नेपाली कांग्रेस तथा नेकपा कार्यकर्ता छन् । स्थानीय राहत वितरणको विषयमा वडाध्यक्ष अशोक साहसँग कुरा गर्न वडा कार्यालय पुगेका थिए । राहत वितरणमा काखापाखा भएको भन्दै भनाभनपछि विवादले उग्ररुप लिएपछि २ पक्षबीच झडप भएको थियो ।

राहतको विषयमा झडप हुँदा नरहा गाउँपालिकाकी उपमेयर गुलाबदेवी चौधरीका छोरा अरविन्द चौधरीले गोलीसमेत चलाएको वताए पनि प्रहरीले यसको पुष्टि गरेको छैन ।

प्रहरीले भने २ पक्षीय झडपमा केही व्यक्ति घाइते भए पनि गोली चलेको वा नचलेकोबारे अहिले पुष्टि हुन नसकेको बताए । ‘गोलीको हल्ला छ, तर पुष्टि भएको छैन,’ सिरहाका प्रहरी नायब उपरीक्षक विनोद घिमिरेले भने । घटना विषयमा अनुसन्धान भइरहेको घिमिरेले समेत बताए ।

कांग्रेसका कार्यकर्ताले वडाध्यक्षसँगै रहेका उपमेयरका छोरा अरविन्दले गोली चलाएको आरोप लगाएका छन् उपमेयर चौधरी र वडाध्यक्ष साह तत्कालिन एमालेबाट निर्वाचित भएका थिए ।