सुर्खेत, १ जेठ-प्रदेश प्रहरी कार्यालयले प्रहरी जवान नरेन्द्र खड्काको मृत्यु भएको सम्बन्धमा छानविन गर्न समिति गठन गरेको छ । मृतकका आफन्तले घटना शंकास्पद भन्दै छानविनको माग गरेपछि प्रदेश प्रहरीले प्रहरी वरिष्ठ उपरीक्षक (एसएसपी)राजेश बाँस्तोलाको संयोजकत्वमा ४ सदस्यीय समिति गठन गरेको हो ।

प्रदेश प्रहरी कार्यालयका प्रवक्ता प्रहरी नायव उपरीक्षक (डीएसपी) लोकनाथ तिम्सिनाले समितिले शुक्रबारदेखि छानबिन सुरू गर्ने बताए । ‘भोलिसम्म शव परीक्षण रिर्पोट आइपुग्छ, त्यसपछि समितिले छानविन सुरू गर्छ,’ उनले भने, ‘घटनाबारे प्रश्न उठिसकेपछि गहिरो अनुसन्धान गर्न छानविन समिति गठन गरिएको हो, शव परीक्षण रिपाेर्ट र अनुसन्धानपछि वास्तविकता पत्ता लाग्छ ।’

पूर्वी सुर्खेतको सिम्ता गाउँपालिकाको देउली प्रहरी चौकीमा कार्यरत खड्का सोमबार सम्पर्कविहीन भएका थिए । मंगलबार बिहान चौकीदेखि अन्दाजी १५ सय मिटर टाढा पेस्तोलसहित उनी मृत अवस्थामा भेटिएका थिए । आफन्तहरूले आत्महत्या नभई हत्या भएको दाबी गर्दै आएका छन् ।

मृतकका दाजु यामबहादुर खड्काले चौकी इञ्चार्जको पेस्तोल कसरी जवानको हातमा पुग्यो  भनेर प्रश्न गरे । ‘ढाडमा नीलडाम, बायाँ छातीमा सानो र दायाँ छातीमा ठूलो प्वाल देखिन्छ’, उनले भने, ‘आत्महत्या गरेको व्यक्तिको हातमा पेस्तोल कसरी रहन सक्छ ? घटना शंकास्पद छ ।’ यामबहादुरले चौकी इञ्चार्ज असई देवबहादुर थलालसहित ४ प्रहरीविरुद्ध किटानी जाहेरी दिने बताए । रासस