एजेन्सी, माघ २८–दिल्ली विधानसमा निर्वाचनको मतगणना सुरु भएको छ । मंगलबार बिहान सुरु भएको मतगणनाको प्रारम्भिक परिणामअनुसार अरविन्द केजरिवालको आम आद्मी पार्टी (आप) ले स्पष्ट बहुमत पाउने देखिएको छ । सुरुवाती मतपरिणाममा आम आद्मी पार्टी एकल बहुमततर्फ अघि बढेको छ । ७० सदस्यीय विधानसभाका लागि भएको निर्वाचनमा ५५ सिटमा आप अगाडि देखिएको छ भने भारतीय जनता पार्टी (भाजपा) १४ सिटमा अघि देखिएको छ ।

यसैगरी भारतीय कांग्रेस पनि एक सिटमा अघि रहेको छ । कांग्रेसका प्रत्यासी हारुन युसुफ बल्लीमारान सिटमा अगाडि रहेका छन् । यो निर्वाचनमा चर्चित अनुहार मानिएका मोडल टाउनमा भाजपाका कपिल मिश्रा र चाँदनी चोकबाट कांग्रेसका प्रत्यासी अलका लाम्बा पछि परेका छन् । दिल्ली सरकारमा मन्त्री रहेका मनिष सिसोदिया र गोपाल राय आ–आफ्नो सिटमा अग्रता बनाइरहेका छन् । ओखलामा आप नेता अमानतुल्लाह खानले अग्रता बनाएका छन् ।

यो नतिजा अन्तिम बनेमा मतसर्वेक्षणबाट गरिएको भविष्यवाणी सही साबित हुनेछ । सबै मत सर्वेक्षणले अरबिन्द केजरिवालको पार्टीले बहुमत हासिल गर्ने देखाएको थियो । सन् २०१५ मा भएको विधानसभा निर्वाचनमा आपले ७० मध्ये ६७ सिट र भाजपाले ३ सिट जितेको थियो ।