एजेन्सी, जेठ १-कोरोना भाइरसले सबैभन्दा बढी प्रभावित संयुक्त राज्य अमेरिकामा निको हुनेको संख्या ३ लाख १० हजार नाघेको छ ।पछिल्लो २४ घण्टामा मात्रै त्यहाँ १४ हजार बढी व्यक्ति कोरोना जितेर घर फर्किएका छन् । अहिले अमेरिकामा १० लाख ३४ हजार व्यक्ति संक्रमितको उपचार भइरहेको छ । जसमध्ये १६ हजार ३ सय व्यक्तिको अवस्था गम्भीर रहेको छ ।

हाल पनि संक्रमण र मृत्युदर तीव्र गतिमा बढिरहेको अमेरिकामा १४ लाख ३० हजार व्यक्ति कोरोनाबाट प्रभावित भएका छन् । जसमध्ये ८५ हजार संक्रमितको मृत्यु भएको छ । गत २४ घण्टामा अमेरिकामा २१ हजार ७ सय नयाँ संक्रमित थपिँदा १ हजार ७ सय व्यक्तिले ज्यान गुमाए ।

विश्वका २ सय १५ देशमा फैलिसकेको कोरोनाबाट अहिलेसम्म विश्वभर ४४ लाख २५ हजार व्यक्ति संक्रमित भएका छन् । जसमध्ये १६ लाख ५७ हजार संक्रमित उपचारपछि निको हुँदा २ लाख ९७ हजार ७ सय व्यक्तिको मृत्यु भएको छ ।