विराटनगर, बैशाख १८–पूर्वमन्त्री तथा प्रतिनिधिसभाका सदस्य शिवकुमार मण्डलले आगमाी बजेटमा कृषकका लागि प्रयाप्त सिँचाई सुविधा सहितको बजेट बिनियोजन गर्न सुझव दिएका छन् ।

उर्जा जलश्रोत तथा सिँचाई मन्त्रालयमा सांसदहरुबिच आगामी बजेटमा समेटिनुपर्ने विषयवस्तुका विषयमा भएको छलफलमा सांसद मण्डलले यस्तो बताएका हुन् ।

उर्जा जलश्रोत तथा सिँचाईमन्त्री वर्षमान पुन ‘अनन्त’ र सांसदहरुबिच भएको छलफलमा सांसद मण्डलले राष्ट्रिय गौरवको सुनसरी मोरङ सिचाई आयोजना मार्फत मोरङमा प्रयाप्त सिँचाई सुविधा पुग्न नसकेको बताउँदै मन्त्रालय मार्फत नहरको विस्तार हुन नसकेकाले ९० प्रतिशत किसानहरु भएको क्षेत्रमा सिँचाई आयोजना विस्तारका लागि प्रयाप्त बजेट बिनियोजन गर्न सुभाव दिए ।

उनले तत्काल आयोजना विस्तार गर्न नसकिएपनि डिप बोरिङका माध्यमबाट जनतालाई सिचाईको प्रवन्ध मिलाउने गरि बजेट बिनियोजन गर्न आग्रह गरे । सांसद मण्डलले सवै प्रकारका योजनाहरुको छनौट सांसदहरुभन्दा पनि सम्बन्धीत विभागका विभागिय कर्मचारी र प्राविधिक मार्फत आवश्यक योजनाहरुको छनौट गरि सांसदसँग छलफलबाट कार्यान्वयन गरिनुपर्नेमा समेत जोड दिए ।

‘सवै सांसदहरुलाई प्राविधिक विषयको ज्ञान छैन, जसका कारण जनताका समस्या मुलभुतरुपमा समाधान गर्न कठिनाई हुँदै आएको छ ।’ उनले भने,‘त्यसैले फिल्ड वर्कमा प्राविधिकहरुले काम गरि योजना छनौट गर्नुपर्छ ।’

उनले प्राविधिक विषयको अनभिज्ञताका कारण सांसदहरुले मात्र छनौट गरेको योजना प्रभावकारी नहुने भएकाले प्राविधिक कर्मचारीहरु मार्फत फिल्ड र्वक गरेर योजना छनौट गर्नुपर्ने बताएका हुन् ।

त्यस्तै वर्षेनी वर्षायाममा आउने बाढीका कारण ठुलो धनजनको क्षती हुँदै आएकाले त्यसलाई रोक्नका लागि समेत विषेश ध्यान दिनुपर्ने उनले बताए । ‘वर्षा याममा जमिन कटान भएर ठुलो जनधनको क्षती हुँदै आएको छ ।’ उनले भने,‘यस्ता कुराहरु नियन्त्रण गर्न नदीका दुवै तर्फ ड्याम बनाएर नदी नियन्त्रण गर्ने तथा बढी कटान गर्ने ठाउँमा ढुंगा जाली हालेर बाढी न्युनिकरण गर्नुपर्छ र यसका लागि पनि प्रयाप्त बजेट बिनियोजन गर्नुपर्छ ।

सांसद मण्डलले मोरङको बक्राह, केशलीया, लोहन्द्रा र सिंघिया खोला नियन्त्रणका लागि केन्द्र सरकारको योजना अन्तर्गत नपरेकाले आगामी बजेटमा समावेश गर्न समेत आग्रह गरे । उनले सुकुम्बासी र सवै गरिब जनताका घरसम्म विजुली विस्तारका लागि पनि मन्त्री पुनको ध्यानाकर्षण गराए ।