एजेन्सी, बैशाख १७-कोरोना भाइरस (कोभिड-१९) संक्रमण धेरै फैलिने देशहरूमध्ये छिमेकी राष्ट्र भारत १५औँ स्थानमा पुगेको छ । विश्वभर ३१ लाख ३९ हजार ४ सय ७१ जनामा कोरोनाको संक्रमण देखिएकोमा भारतमा ३१ हजारभन्दा बढीमा संक्रमणकाे पुष्टि भएको छ । भारतमा बुधबारसम्म ३१ हजार ३ सय २४ जनामा संक्रमण देखिएको छ । यहाँ १ हजार ८ जनाको काेराेनाबाट मृत्यु भएको छ ।

कोरोना भाइरसबाट अमेरिका सबैभन्दा धेरै प्रभावित बनेको छ । यहाँ १० लाख ३५ हजार ७ सय ६५ जना संक्रमित भेटिएका छन् । संक्रमणबाट मृत्यु हुनेको संख्या ६० हजारनजिक पुगेको छ ।

दोस्रो नम्बरमा स्पेन छ । यहाँ २ लाख ३२ हजार १ सय २८ जनामा संक्रमण देखिएको छ भने मृत्यु हुनेको संख्या २३ हजार ८ सय २२ पुगेको छ । तेस्रो, चौथो पाँचौँ नम्बरमा क्रमश: इटाली २ लाख १ हजार ५ सय ५ जना, फ्रान्स १ लाख ६५ हजार ९ सय ११ जना, यूके १ लाख ६१ हजार १ सय ४५ जना संक्रमित रहेका छन् ।

जर्मन टर्की, रसिया, इरान र चीन क्रमश: संक्रमितको संख्याको आधारमा छैटौँ, सातौँ, आठौँ, नवाैँ र दशौँ स्थानमा रहेका छन् । त्यसैगरी, ब्राजिल, क्यानडा, बेल्जियम, नेदरल्याण्ड संक्रमण दरका आधारमा ११औँ, १२औँ, १३औँ र १४औँ स्थानमा छन् ।

५ महिनाअघिदेखि चीनको वुहानबाट सुरु भएर विश्वभर महामारीका रूपमा फैलिएको कोराना भाइरसबाट विश्वभरमा अहिलेसम्म २ लाख १८ हजार २४ जनाको मृत्यु भएको छ । त्यस्तै, उपचारपछि निको भएर घर फर्किनेको संख्या ९ लाख ५९ हजार २ सय २४ रहेको छ ।