रुकुम हत्या काण्ड छानविन गर्न सांसद बराइलीको माग - News Birat

रुकुम हत्या काण्ड छानविन गर्न सांसद बराइलीको माग

न्यूज विराट

विराटनगर, जेठ १५–नेपाल कम्युनिष्ट पार्टी (नेकपा) सांसद उमिता बराईलीले रुकुम हत्या काण्डको संसदिय समिति मार्फत छानविन गर्न माग गरेकी छन् । बिहिबार प्रदेश नं. १ प्रदेशसभा बैठकको शुन्य समयमा बोल्दै सांसद बराईलीले सो घटनाको संददिय समिति मार्फत छानविन गर्न संघिय सरकारसँग माग गरेकी हुन्।

उनले मुलुकमा गणतन्त्र आइसके पनि दलित समुदायले न्यायको अनुभुति गर्न नपाएको भन्दै सरकारको ध्यानाकषण समेत गराइन । सांसद बराइलीले एक नम्बर प्रदेशमा पनि दलित समुदाय माथि अन्तरजातीय विवाहका नाममा जेल हाल्ने, बहिष्कार गर्ने र यातना दिने कार्य भैरहेकोले सरकारलाई गम्भिर बन्न आग्रह गरिन् ।

उनले समाजमा कानुन अनुसार उमेर नपुगेपनि विबाह गर्ने गराउने काम भैहरेको बताउँदै जात नमिलेकै आधारमा उमेरहदको बहाना बनाएर जेल हाल्ने र यातना दिने जस्ता काम भइरहेको आरोप लगाइन् ।

सांसद बराईलीले जातकै कारण प्रेमी र उनका साथीहरुलाई सांघातिक आक्रमण गरेर हत्या गर्नु अति नै क्रुर अमानविय घटना भन्दै दोषीलाई कडा कार्वाहीको माग समेत गरिन् ।

समाजवादी पार्टीका सांसद जयराम यादबले गणतन्त्र आइसक्दा पनि दलित समुदायमाथि जातिय बिभेद भैरहनु अमानविय कार्य भएको बताए । उनले पश्चिम रुकुममा भएको अपराधिक घटनासँगै सबैखाले जातिय विभेदको अन्त्य गराउन सरकारसँग माग गरे ।

सांसद लीला सुब्बाले गणतन्त्रमा अझै पनि दलित र महिलाहरुमाथि हिँसा भैरहेको बताउँदै त्यसको अन्त्य गराउनुपर्नेमा जोड दिइन् । काँग्रेस संसदिय दलका उपनेता हिमाल कार्की र सचेतक सुयर्माराज राईले रुकुमको अपराधिक घटना अत्यन्तै क्रुर र अमानविय भएकाले दोषीलाई कडाभन्दा कडा कार्वाही हुनुपर्ने माग गरे ।

रुकुमको चौरजहारीकी सुष्मा ठकुरी र जाजरकोटका नवराज बिश्वकर्माले अन्र्तजातिय बिवाह गर्न लागेको थाहा पाएर १० जेठमा केटी पक्षले प्रेमी नवराज र उनका साथीहरुलाई कुटपिट गरेर हत्या गरेका थिए । नवराजसहित ४ जनाको शव भेरी नदीमा मृत अवस्थामा फेला परिसकेको छ । अझै २ जना बेपत्ता रहेकाले खोजि कार्य जारी रहेको जनाइएको छ ।

मा प्रकाशित

यसमा तपाईको मत:

© Copyright 2017 - 2021 Newsbirat pvt ltd. All Rights Reserved.

Design / Developed by codebundles