जनकपुर, ७ बैशाख-जनकपुरधामको महावीर चोकमा पैसा फालेर फरार भएको आरोपमा पक्राउ परेकी दुई महिलामध्ये एक जनाको आरडिटी रिपोर्ट पोजेटिभ देखिएपछि महिला बस्ने एरियालाई बिहानैदेखि सेनिटाइज गर्ने कार्य सुरु गरिएको छ ।

जनकपुरधाम ७ का वडाध्यक्ष जानकीराम साह आफैं सेनिटाइज गर्ने टोली लिएर खटिएका छन् । जानकीनगर टोलभरी नै सेनिटाइजन गरिने वडाध्यक्ष साहले बताए ।

हरेक व्यक्तिको जीवनशैली नै कोरोना भाइरसका कारण परिवर्तन भएको छ । देश लकडाउनमा छ । सर्वसधारण घरबाहिर निस्केका छैनन् । बाहिर निस्केकाहरु पनि सामाजिक दूरी कायम गरिरहेका छन् । कोही दैनिक कैयौंपटक साबुन पानीले हात धुन्छन् त कोही सेनिटाइजर प्रयोग गर्छन् ।

तर पनि कोरोना भाइरसको खतरामा रहेको महसुस सर्वसधारणले गरिरहेका छन् । प्रदेश २ का कैयौं स्थानीय तहले कोरोना भाइरसबाट जोगिन टोल–टोलमा कीटाणु मार्ने औषधि छर्किरहेका छन् । कोरोनाबाटै जोगिन जनकपुरधाम उपमहानगरपालिकाले एकसाता अघि नगरको विभिन्न स्थानमा औषधी छर्केका थिए ।