काठमाडौं, फागुन ११–नेपाल ललितकला प्रज्ञा प्रतिष्ठानले स्थापना दिवसको अवसरमा ‘राष्ट्रिय ललितकला प्रदर्शनी’ आयोजना गर्ने भएको छ । वैशाख २ गतेबाट सुरु हुने प्रदर्शनी तीन हप्तासम्म चल्ने प्रतिष्ठानका कुलपति केके कर्माचार्यले जानकारी दिए । आइतबार पत्रकार भेटघाट आयोजना गर्दै बबरमहलस्थित नेपाल कला परिषदमा प्रदर्शनी गर्न लागिएको प्रतिष्ठानले जानकारी दिएको हो ।

प्रदर्शनीमा राखिने विभिन्न कलाकारको कलाकृति एक महिनाभित्र प्रतिष्ठानमा बुझाउन माघ १४ मा सूचना प्रकाशन गरिसकेको कुलपति कर्माचार्यले बताए । उनका अनुसार कलाकृति पठाउनु पर्ने अन्तिम मिति फागुन १३ तोकिएको भए पनि ७ दिन म्याद थप गरिएको छ । थप समयभित्र कलाकृति उपलब्ध गराइदिन सबै कलाकारलाई प्रतिष्ठानले विज्ञप्तिमार्फत अनुरोध गरेको छ ।

विजेतालाई विभिन्न विधामा ललितकला, कला लेखन र प्रादेशिक पुरस्कार प्रदान गरिने छ । ललितकला पुरस्कारअन्तर्गत चित्रकला, मूर्तिकला, हस्तकला, शिल्पकला, लोककला, वास्तुकला र सिर्जनात्मक कलाका विधा रहेका छन् । त्यसैगरी, कला लेखन र प्रादेशिक पुरस्कारको पनि प्रतिष्ठानले घोषणा गरेको छ ।

प्रदर्शनी प्रतियोगी र अप्रतियोगी गरी दुई किसिमको हुने कुलपति कर्माचार्यले जानकारी दिए । ‘अप्रतियोगी प्रदर्शनीमा सबैले भाग लिन पाउनेछन् । उत्कृष्टलाई सम्मानस्वरुप पुरस्कार प्रदान गरिने छ,’ उनले भने, ‘प्रतियोगीहरुले उल्लेख गरिएअनुसार पुरस्कार पाउनेछन् ।’ प्रदर्शनीमा करिब ५ सय कलाकृति रहने अनुमान गरिएको छ ।