चार देशीय क्रिकेट श्रृंखला : अन्तिम खेलमा नेपाल आयरल्याण्डसँग पराजित - News Birat

चार देशीय क्रिकेट श्रृंखला : अन्तिम खेलमा नेपाल आयरल्याण्डसँग पराजित

न्यूज विराट

ओमानमा सम्पन्न चार देशीय टी–२० क्रिकेट श्रृंखलाको अन्तिम खेलमा नेपाल आयरल्याण्डसँग पराजित भएको छ । १२८ रनको लक्ष्य पाएको नेपालले निर्धाति २० ओभरमा ९ विकेट गुमाए १११ रनमात्र बनाउन सक्यो ।

पावर प्लेमै दुई विकेट गुमाउँदा दबाबमा परेको नेपाल त्यसपछि सम्हालिन सकेन । नेपालले पहिलो विकेटका लागि २६ रनको साझेदारी गरेको थियो । आसिफ शेख र कुशल भुर्तेलले ओपनिङ गरेका थिए । लो स्कोर पछ्याइरहेको नेपालले पावर प्लेलमा कुशल भुर्तेल र लोकेश बमका रुपमा दुई विकेट गुमाएको थियो । ११ बलमा १५ रन बनाए भुर्तेल बोल्ड आउट भए भने तेस्रो नम्बरमा ब्याटिङ गर्न आएका लोकेश बम ८ बलमा ६ रन बनाएर आउट भए । उनले एक छक्का प्रहार गरेका थिए । नेपालले ६ ओभरमा २ विकेट गुमाएर ४० रन बनाएको थियो।

त्यसपछि पनि नेपालको विकेट जानेक्रम रोकिएन । लगातारको अन्तरालमा विकेट गुमाएको नेपालका लागि सर्वाधिक रन दिपेन्द्रसिंह ऐरीले बनाएका थिए । उनले ३० बलमा २८ रन बनाए । यस्तै आसिफ शेखले २३ रन बनाए भने कुशल भुर्तेलले १५ रन बनाए । कमलसिंह ऐरीले १३ रन बनाए । शरद भेषवाकर एक रनमा आउट हुँदा ज्ञानेन्द्र मल्लले ५ रनमात्र बनाएका थिए ।

यसअघि टस हारेर पहिला ब्याटिङ गरेको आयरल्याण्डले निर्धारित २० ओभरमा ९ विकेट गुमाएर १२७ रन बनाएको थियो । दिपेन्द्रसिंह ऐरीले ४ विकेट लिएपछि उसले ठूलो स्कोर बनाउन सकेन ।

यो खेलमा पराजित भएसँगै नेपालले श्रृंखला जित्ने मौका पनि गुमायो । नेपालले श्रृंखलाका ३ मध्ये एक खेलमा जित हात पारेको थियो । ओमानलाई पराजित गरेको नेपाल यूएई र आयरल्याण्डसँग पराजित भयो । श्रृंखला दुई खेल जितेको यूएईले जितेको छ ।

अब नेपालले यही फागुन ६ बाट विश्वकप छनोट खेल खेल्नेछ । छनोट खेलको फाइनलमा पुग्ने दुई टिम २०२२ को अन्तिममा अष्ट्रेलियामा हुने विश्वकपमा सहभागी हुन पाउनेछन् ।

मा प्रकाशित

यसमा तपाईको मत:

© Copyright 2017 - 2022 Newsbirat pvt ltd. All Rights Reserved.

Design / Developed by codebundles