विराटनगर — नेकपा एमाले कोशी प्रदेश कमिटीले ताप्लेजुङमा राष्ट्रिय युवा संघको जिल्ला अधिवेशनमा उत्पन्न विवादका कारण दुई नेतालाई निलम्बन गरेको छ।

निलम्बनमा पूर्व सांसद एवं जिल्ला अध्यक्ष बलबहादुर साम्सोहाङ र प्रदेश पर्यटन विभागका सचिव मणिशंकर पोमु रहेका छन्।

गत वैशाख १८ गते सम्पन्न युवा संघ ताप्लेजुङको जिल्ला अधिवेशनमा संस्थापन पक्षले एकलौटी रूपमा कमिटी गठन गरेको भन्दै विरोध जनाएपछि उनीहरूमाथि कारबाही गरिएको हो।

एमाले कोशी प्रदेश अध्यक्ष घनश्याम खतिवडाका अनुसार ताप्लेजुङ कमिटीले दिएको राय सुझावको आधारमा दुई नेताले बढ्ता गरेको भन्दै निलम्बन गरिएको हो।

निलम्बनमा परेका नेता साम्सोहाङले भने, “हामीले अधिवेशनमा सहमतिको लागि सचिवको माग गरेका थियौं। तर, अध्यक्षमण्डलले एकलौटी रूपमा नाम घोषणा गरेपछि हामीले विरोध गर्यौ। त्यसैकारण हामीमाथि कारबाही गरिएको होला।” उनले पार्टीभित्रको बहस र स्थिति हेरेर अघि बढ्ने बताए।

फुङलिङस्थित एमाले कार्यालयमा सम्पन्न अधिवेशनमा संस्थापन पक्षले मानिक तुम्बाहाम्फेलाई अध्यक्ष घोषणा गरेपछि विवाद चुलिएको थियो। बन्द सत्रको क्रममा नयाँ कमिटीको नाम एकलौटी रूपमा घोषणा गर्न खोज्दा प्रतिनिधिहरूबीच झडप भई टेबल, कुर्सी र माइकसमेत तोडफोड भएको बताइएको छ।

निलम्बनमा परेका नेताहरू एमालेका वरिष्ठ नेता योगेश भट्टराई निकट मानिन्छन्। उनीहरू पूर्व माधवकुमार नेपाल समूहका भए पनि दस बुँदे सहमतिपछि एमालेमै बसेका थिए।