हङकङमा एक आवासीय बिल्डिङबाट खसेर एक नेपाली युवतीको मृत्यु भएको छ । हङकङको मोङककस्थित एक बिल्डिङबाट आइतबार साँझ दुई दिदीबहिनी खस्दा उपचारका क्रममा दिदीको मृत्यु भएको हो ।

अन्तर्राष्ट्रिय संचार माध्यमका अनुसार आइतबार साँझ दुवै दिदीबहिनी बिल्डिङबाट खेसेका थिए । तत्कालै उनीहरूलाई अस्पतालमा पर्‍याइएकोमा दिदीको उपचारका क्रममा मृत्यु भएको हो । ४० वर्षीया दिदी गर्भवती रहेको र शल्यक्रियामार्फत शिशुलाई जन्मदिएलगत्तै उनको मृत्यु भएको अस्पताल स्रोत भनाइ उद्धृत गर्दै संचारमाध्यमले जनाएका छन् ।

बिल्डिङबाट सँगै खसेकी २७ वर्षीय बहिनी भने सकुशल रहेको र अस्पतालमा उपचार भइरहेको जनाइएको छ । प्रहरीका अनुसार उनीहरू आइतबार साँझ करिब ७ बजे मोङककको रिक्लामेसन स्ट्रिटस्थित बिल्डिङबाट खसेका थिए । त्यहाँ उनीहरू डेरामा बस्ने गरेको बताइएको छ । घटना कसरी भयो भन्नेबारे अनुसन्धान भइरहेको र विस्तृत रिपोर्ट आउन बाँकी रहेको स्थानीय प्रहरीले जनाएको छ ।

हङकङमा कोरोना भाइरस संक्रमणलाई फैलन नदिन सरकारले सार्वजनिक स्थलमा चार जनाभन्दा बढी मानिस भेला हुन रोक लगाइएको छ । त्यसैले अधिकांश मानिस घरमै बस्दै आएका छन् । हङकङमा ८९१ जनामा कोरोना संक्रमण देखिएको छ भने संक्रमणबाटै ४ जनाको मृत्यु भएको पुष्टि भएको छ ।