हेटौंडा, १६ जेठ-मकवानपुरमा ४३ वटा बालविवाह रोकिएका छन् । पछिल्लो समय जिल्लामा बालविवाहको घटना वृद्धि हुँदै गइरहेको अवस्थामा विगत ४ महिनाको अवधिमा ४३ वटा बालविवाह रोकिएको हो ।

बालबालिकाको क्षेत्रमा काम गर्दै आइरहेको सिबिन बाल हेल्प लाइन हेटौँडाका अनुसार २०२० को जनवरी १ देखि मे २७ सम्म ४ महिनाको अवधिमा ११ जना बालक र ३२ जना बालिकाको बालविवाह रोकिएको हो ।

यस अवधिमा भीमफेदी गाउँपालिका ३ जनाको बालबिवाह रोक्न भने असफल भएको सिविन बाल हेल्पलाईन हेटौँडाका प्रमुख झविन्द्र ज्ञवालीले जानकारी दिए । उनले पछिल्लो समय जिल्लामा बालविवाहको घटना वृद्धि हुँदै गएको भन्दै २०७८ सालसम्म बालविवाहमुक्त प्रदेश घोषणा गर्ने योजनामा चुनौती रहेको बताए ।

जिल्लामा श्रमशोषणको अवस्था भने घट्दो छ । ४ महिनाको अवधिमा एकजना बालक मात्र श्रमशोषणमा परेको सिबिनको तथ्यांकमा उल्लेख छ । त्यसैगरी बेचबिखनमा परेका २ जना बालिकाको उद्धार गरिएको छ । सिबिनको तथ्यांकअनुसार ७ जना बालकलाई परिवारसँग मिलन गराउन सफल भएको र एक जनालाई अनाथ अपाङ्ग पुनस्र्थापन केन्द्रमा पठाइएको छ ।