विराटनगर । गुणस्तरीय शिक्षाको माध्यमबाट विद्यार्थी र अभिभावकको विश्वास जित्दै आएको विराटनगरस्थित शिक्षादीप कलेजले कक्षा ११ विज्ञान संकायका उत्कृष्ट विद्यार्थीहरूलाई पुरस्कृत गरेको छ ।
कलेजले लिएको तेस्रो त्रैमासिक परीक्षामा ७५ प्रतिशतभन्दा बढी अंक ल्याउने ५९ जना विद्यार्थीहरूलाई कलेज परिसरमा मंगलबार एक कार्यक्रमबीच नगदसहित पुरस्कार प्रदान गरिएको हो ।
कार्यक्रममा बोल्दै कलेजका प्रिन्सिपल ज्ञानबहादुर खड्काले विद्यार्थीहरूलाई लगनशीलता, अनुशासन र निरन्तर अभ्यास नै सफलताको आधार हुने उल्लेख गर्दै फाइनल परीक्षामा समेत उत्कृष्ट नतिजा ल्याउन शुभकामना दिए । ‘पढाइलाई लक्ष्यअनुसारको मेहनत र स्पष्ट योजनासहित अघि बढाउनुहोस् । जीवनमा सफलता यत्तिकै हुँदैन, यसको लागि निरन्तरता आवश्यक हुन्छ ,’ प्रिन्सिपल खड्कालले भने ।

प्राप्त नतिजाअनुसार शिरिन भट्टराईले ९४.२ प्रतिशत ल्याएर प्रथम स्थान हासिल गरेकी छन् । शकिल अहमद ९४ प्रतिशत अंकसहित दोस्रो स्थानमा रहँदा, सौगात सुवेदीले ९२.५ प्रतिशत ल्याएर तेस्रो स्थान प्राप्त गरेका छन् । सम्मानित विद्यार्थीहरूलाई प्रिन्सिपल खड्का, कलेजका निर्देशक भुपेन्द्र दाहाल, विज्ञान संकाय संयोजक नवीन रोय, तथा निर्देशक रामचन्द्र अधिकारी लगायतले प्रशंसा पत्र र नगद पुरस्कार वितरण गरेका थिए ।

कलेज व्यवस्थापनका अनुसार यस्तो सम्मानले विद्यार्थीहरूलाई अझै प्रेरित गर्ने र आगामी परीक्षामा अझ उत्कृष्ट नतिजा ल्याउन उत्प्रेरित गर्ने विश्वास लिइएको छ ।