प्रदेश १ का स्वास्थ्य संस्थाले फिबर क्लिनिक बन्द गरेको भन्दै तत्काल सञ्चालन गर्न निर्देशन दिइएको छ । सामाजिक विकास मन्त्रालयले आकस्मिक र फिबर क्लिनिक बाहेकका सेवा बन्द गर्न निर्देशन दिए पनि कतिपय स्वास्थ्य संस्थाले फिबर क्लिनिक पनि बन्द गरेको गुनासो आएपछि तत्काल सञ्चालन गर्न निर्देशन दिइएको हो ।

सामाजिक विकासमन्त्री एवं आईसोलेसन तथा विशिष्टिकृत अस्पताल एवं प्रयोगशाला सञ्चालन तथा व्यवस्थापन समिति अध्यक्ष जीवन घिमिरेको अध्यक्षतामा मन्त्रालयमा बसेको बैठकले कोरोना संक्रमितको उपचारका व्यवस्था तत्कालनका लागि कोसी अस्पताल (कोरोना उपचार केन्द्र) र सुनसरी धरानको बीपी कोइराला स्वास्थ्य विज्ञान प्रतिष्ठानले गर्ने निर्णय गरेको छ ।

संक्रमण बढ्दै गएमा विराट मेडिकल कलेज बुढीगंगा, नोबेल मेडिकल कलेज विराटनगर, बीएण्डसी अस्पताल विर्तामोड तयारी अवस्थामा रहने निर्णय भएको प्रवक्ता डा. सुरेश मेहताले बताए ।

कोसी अस्पताल (कोरोना उपचार केन्द्र) सञ्चालनका लागि आवश्यक जनशक्ति कोसी अस्पताल, बीपी कोइराला स्वास्थ्य विज्ञान प्रतिष्ठान, नोबेल अस्पताल, विराट मेडिकल कलेज र विएण्डसीले सहयोग गर्ने निर्णय भएको उनले बताए ।

बैठकले सामाजिक विकास मन्त्रालयको जनस्वास्थ्य महाशाखा प्रमुख तथा प्रवक्ता डा. सुरेश मेहताको संयोजकत्वमा कोरोना रोकथामको उपचारसम्बन्धी मार्गदर्शन तयार गर्नका लागि ५ सदस्यीय समिति गठन गरेको छ ।

समिति सदस्यहरूमा कोसी अस्पताल विराटनगरकी मेडिकल सुपरिटेन्डेन्ट डा. संगीता मिश्रा, अफिन प्रदेश अध्यक्ष डा. शंकरप्रसाद अधिकारी, विराट मेडिकल कलेजका डा. हेमसागर रिमाल र बीपी कोइराला स्वास्थ्य विज्ञान प्रतिष्ठानका एक प्रतिनिधि सदस्य रहने बैठकले निर्णय गरेको छ ।

समितिले व्यक्तिगत सुरक्षा उपकरण (पीपीई) प्रयोग सम्वन्धि मापदण्ड, स्वास्थ्यकर्मीको भूमिका निर्धारण, कोरोना रोकथाम तथा फोहोर व्यवस्थापन, उपचार र एम्बुलेन्स सञ्चालन तथा संक्रमण व्यवस्थापनसम्बन्धी मार्ग दर्शन तयार गर्ने बताइएको छ ।

बैठकले प्रदेश १ का सम्पूर्ण स्वास्थ्यकर्मीको सूची संकलन गर्ने र तत्काल कोरोना संक्रमितका उपचारका लागि खटिएका स्वास्थ्यकर्मी र कर्मचारीका लागि पीपीई उपलब्ध गराईने पनि निर्णय गरेको छ ।

कोरोना संक्रमितका उपचारका लागि खटिएका स्वास्थ्यकर्मी र कर्मचारीको तलवको अतिरिक्त प्रोत्साहन भत्ता, सेवाको क्रममा विरामी भए निशुल्क उपचार को प्रवन्ध र निःशुल्क बीमाको प्रबन्ध गर्ने निर्णय गरेको प्रवक्ता डा. मेहताले बताए ।