दुहबी । दुहबी नगरपालिका र करुणा फाउन्डेसन नेपालको संयुक्त आयोजनामा दुहबी वडा नं. १२ मा सम्पन्न पाठेघरको मुखको क्यान्सर परीक्षण तथा उपचार शिविरमा कुल १४२ जना महिलाको स्क्रिनिङ गरिएको छ। जसमध्ये २ जना महिलामा भिआए पोजेटिभ देखिएपछि सोही ठाउँमै उपचार समेत गरिएको छ।

शिविरमा बि।पि। कोइराला स्वास्थ्य विज्ञान प्रतिष्ठानका वरिष्ठ स्त्री तथा क्यान्सर रोग विशेषज्ञ डा. रमेश श्रेष्ठ, डा. सुर्य प्रसाद रिमाल, डा. जोशना यादव, तथा कोअर्डिनेटर सिनियर अनमी पुजन सुब्बाले स्वास्थ्य सेवा प्रदान गरेका थिए ।

यसअघि दुहबी वडा नं. ४, ११ र १२ मा गरी जम्मा ४५५ महिलाको स्क्रिनिङ गरिएको थियो, जसमा ८ जना महिलामा पोजेटिभ देखिएको थियो। ती सबैको थर्मोकोएगुलेसन विधिबाट तत्कालै उपचार गरिएको छ। उपचार गरिएका महिलाहरूले झन्डै १५ देखि २० हजार रुपैयाँ बराबरको खर्च बचत गर्न सफल भएका छन्।

शिविरमा सक्रिय सहभागी भएर सहयोग गर्ने स्वयंसेविका दिदीबहिनीहरू तथा निरन्तर साथ दिइरहनुभएकी पिंकी भगत म्यामलाई आयोजक टोलीले विशेष धन्यवाद ज्ञापन गरेको छ।

शिविरले शहरी तथा ग्रामीण भेगका महिलाहरूलाई लाभ पुर्‍याउनुका साथै पाठेघरको मुखको क्यान्सर सम्बन्धी जनचेतना बढाउन महत्वपूर्ण भूमिका खेलेको दुहबी नगरपालिकाले जनाएको छ। आयोजकका अनुसार एक पटक गरिएको यो परीक्षण ३ वर्षसम्म विश्वसनीय रहन्छ।