विराटनगर । विराटनगर ११, जनपथ टोलमा आज ‘सृष्टि क्रिस्टी एसके स्केट जो एण्ड वीआर’ नामक नयाँ तथा अत्याधुनिक मनोरञ्जन केन्द्र संचालनमा आएको छ । विकास गुरुडद्वारा सुरु गरिएको यस व्यवसायको शुभारम्भ नेपाली चलचित्रका चर्चित नायक धिरेन शाक्यले उद्घाटन गरेर बुधबारदेखि संचालनमा आएको हो ।

कार्यक्रममा स्थानीय युवा, समाजसेवी, व्यवसायी तथा विभिन्न क्षेत्रका प्रतिष्ठित व्यक्तित्वहरूको उल्लेखनीय उपस्थिति थियो। उद्घाटन समारोहमा अभिनेता शाक्यले स्वदेशमै नयाँ अवसरहरू सिर्जना गर्दै युवाहरूलाई सिर्जनशीलता र आत्मनिर्भरताको बाटोमा डोऱ्याउने यस्ता पहलहरू अत्यन्त सराहनीय भएको बताएका थिए।

कार्यक्रममा प्रमुख अतिथि धिरेन शाक्यसँगै नेकपा एमाले कोशी प्रदेश सदस्य सन्तोषी श्रेष्ठको पनि विशेष उपस्थिति रह्यो। मन्तव्य राख्दै श्रेष्ठले भनिन्, “विकास गुरुडजस्ता युवाहरूले सुरु गरेको यस्ता नविन व्यवसायले मुलुकमा रोजगारी सिर्जना गर्न र स्थानीय अर्थतन्त्रलाई चलायमान बनाउन ठूलो टेवा पुर्‍याउँछ। यस्तो सकारात्मक सोच भएका युवाहरू हाम्रो समाजका लागि प्रेरणाको स्रोत हुन्।”
कार्यक्रममा युवा नेता वसिम आलमको पनि सहभागिता रहेको थियो।

‘सृष्टि क्रिस्टी एसके स्केट जो एण्ड वीआर’ मा स्केट जोन, भर्चुअल रियालिटी गेमिङ र अन्य अत्याधुनिक मनोरञ्जनका प्रविधिहरू उपलब्ध गराइएका छन्, जसले विशेषगरी बालबालिका, किशोर–किशोरी तथा युवाहरूलाई लक्षित गरेको छ।

व्यवसायका संस्थापक विकास गुरुडले उद्घाटन समारोहमा मन्तव्य दिँदै भने, “देशमै बसेर पनि नयाँ र विश्वस्तरीय अनुभव दिने प्रयास गरेका छौं। युवाहरूका लागि सिक्ने र रमाउने दुबै माध्यमको संयोजन हो यो केन्द्र।”

यस प्रकारका व्यवसायहरूले विराटनगरमा नवीनतम प्रविधिको प्रयोगमार्फत मनोरञ्जन क्षेत्रमा नयाँ युगको थालनी गर्ने विश्वास गरिएको छ।