विराटनगर, ५ जेठ-गाई र गोरु काटको अभियोगमा प्रहरीले ९ जनालाई पक्राउ गरेको छ । प्रदेश १ प्रहरी झापाबाट २ जना र खोटाङबाट ७ जनालाई पक्राउ गरेको हो ।

झापा दमक बेलडागी–२ भुटानी शरणर्थी शिविरस्थितए घरमा गाई काटिरेहको अवस्थामा २ जना पक्राउ परेका छन् । पक्राउ पर्नेमा बेलडागी–२ हर्ट नम्बर २९५ सेक्टर नम्बर ‘ए’ का २६ वर्षीय शुनील गुरुङ र बेलडागी–२ हर्ट नम्बर २०८ सेक्टर नम्बर ‘ए३’ का ३२ वर्षीय खगिन्द्र दुलाल रहेका छन् ।

बिहीबार साँझ उनीहरूले गाई काटिरहेको भन्ने स्थानीयले प्रहरीमा खबर गर्नसाथ तत्काल खटिएको प्रहरी टोलीले मासु काटिरहेको अवस्थामा पक्राउ गरिएको ईलाका प्रहरी कार्यालय दमकले जनाएको छ ।

त्यस्तै, खोटाङ हलेसी तुवाचुङ–५ मयांखु स्थितमा गोरु काटिरहेको अवस्थामा ७ जना पक्राउ परेका छन् । पक्राउ पर्नेमा सोही स्थानमा बस्नेहरू देशबहादुर सार्की, हीरा सार्की, सुभाष सार्की, रवीन सार्की, अमृत सार्की, सीता सार्की र लीलाबहादुर खड्का रहेका छन् ।

बिहीबार साँझ ६ बजे स्थानीयले दिएको सूचनाअनुसार खटिएको प्रहरीले सातै जनालालई गोरू काटिरहेको अवस्थामा नियन्त्रणमा लिएको प्रदेश प्रहरी कार्यालय विराटनगरले जनाएको छ ।