विराटनगर, फागुन १४–विराटनगर महानगरपालिकाले प्रदेश राजधानीको स्थायी संरचनाका लागि आबश्यक जग्गा उपलब्ध गराउन तत्पर रहेको जनाएको छ । प्रदेश १ का सभामुख प्रदिपकुमार भण्डारीलाई ज्ञापनपत्र बुझाउँदै प्रदेश राजधानीका लागि आबश्यक जग्गा उपलब्ध गराउन महानगरपालिका तत्पर रहेको जनाएको हो ।

विराटनगर महानगरले नगरका विभिन्न स्थानमा रहेका ऐलानी तथा सरकारी स्वामित्वका जग्गाहरू प्रदेश सरकारले स्थायी संरचना निर्माणका लागि प्रयोग गर्न प्रस्तावसमेत गरेको छ । विराटनगर महानगरपालिकाका मेयर भीम पराजुलीले विराटनगर महानगरपालिकाका विभिन्न वडामा सरकारी स्वामित्वका प्रर्याप्त जग्गाहरू रहेकाले त्यस्ता जग्गाहरूमा राजधानीका स्थायी संरचना बनाउन सकिने बताए ।

उनले प्रदेश सरकारलाई आबश्यक परे थप जग्गासमेत महानगरपालिकाले खरिद गरेर उपलब्ध गराउने बताए । प्रदेश १ का सभामुख प्रदीपकुमार भण्डारीले प्रदेश राजधानीका लागि स्थायी संरचना निर्माण गर्न प्रदेश सरकारसँग छलफल गर्ने बताउनुभयो । भण्डारीले प्रदेशसभाका लागि र्बैठक हल साँघुरो भएकाले तत्कालै हलको व्यवस्था गर्नेबारे प्रदेशसरकारसँग छलफल पनि भइसकेको जानकारी दिए ।

राजधानी तोकिइसकेकाले त्यसै अनुरुपका संरचना बन्न जरुरी रहेको भण्डारीको भनाई छ । विराटनगर महानगरपालिकाले बुझाएको ज्ञापनपत्रमा महानगरपालिका क्षेत्रभित्रका विभिन्न स्थानका जग्गामा प्रदेशको स्थायी संरचना निर्माणको प्रस्ताव गरिएको छ । वडा नम्बर १ देखि १९ सम्मका उपयुक्त जग्गामा प्रदेश सरकारले स्थायी संरचना निर्माण गर्नसक्ने महानगरपालिकाले जानकारी दिएको छ ।