विराटनगर । नेकपा माओवादी केन्द्र विराटनगर महानगर समितिको दोस्रो अधिवेशनबाट ८१ सदस्यीय कार्यसमिति सर्वसम्मत रुपमा चयन गरिएको छ ।

कुल ३५६ प्रतिनिधिहरूको सहभागितामा सम्पन्न अधिवेशनबाट निर्वाचित कार्यसमितिले अब अध्यक्षसहित सात पदाधिकारी चयन गर्ने जिम्मेवारीमा रहेको छ ।
निर्वाचन समितिका सदस्य एवं माओवादी केन्द्र विराटनगरका इन्चार्ज भोगेन्द्र यादवका अनुसार सर्वसम्मत कार्यसमिति चयन भए पनि पदाधिकारी चयन भने केही समयका लागि स्थगित गरिएको छ । ‘नयाँ कार्यसमिति चयन भएपछि अर्को सूचना नभएसम्मको लागि स्थगित गरिएको छ,’ यादवले जानकारी दिए ।
अध्यक्ष पदका लागि तीन जना आकांक्षी छन् । वर्तमान सचिव नमिता न्यौपाने, वर्तमान उपाध्यक्षहरू दिनेश कुमार राजवंशी र ज्ञानु भट्टराईले अध्यक्ष पदमा दाबी गरेका छन् । उपाध्यक्ष पदका लागि ९ जना आकांक्षी देखिएका छन्, जसमा धर्म लाल माझी, सरस्वती ओझा, सावित्रा गौतम पुष्पा, चन्द्र वन, दिनेश कुमार कामत, रामबती साह, सनोज यादव, सारदा मैलानी र बद्री दाहालको नाम अगाडि आएको छ ।
त्यस्तै, सचिव पदका लागि केपी चौलागाई, आजम प्रवेज र पुष्पराज भट्टराईले आफ्नो दाबी प्रस्तुत गरेका छन् । सहसचिव पदमा आठ जनाको आकांक्षा देखिएको छ । जसमा मोहन ढकाल, भरत गिरी, सोनु केवट, राज यादव, विनोद यादव, द्वारिका रेग्मी, चम्पा कार्की र राजेन्द्र थापा मुख्य दावेदारका रूपमा छन् ।

कोषाध्यक्ष पदमा भने कुनै प्रतिस्पर्धा नभएको निर्वाचन समितिले जनाएको छ । मनिष सोनीको एकल दाबी परेकोले उनी सर्वसम्मत हुनेछन् । निर्वाचन समितिले आधिकारी घोषणा गर्न भने बाँकी रहेको छ ।
हाल निर्वाचित कार्यसमिति ८१ सदस्यीय रहेको छ भने थप १८ सदस्य मनोनयनमार्फत समितिमा समावेश गरिनेछ । समग्रमा ९९ सदस्यीय महानगर कमिटी बन्नेछ जसमा अध्यक्ष १, उपाध्यक्ष ३, सचिव १, सहसचिव १ र कोषाध्यक्ष १ गरी ७ पदाधिकारी हुनेछन् ।
पदाधिकारी चयनमा आकांक्षीहरूको संख्या धेरै भएको कारण सहमतिको आधारमा टुंगो लगाउने प्रयत्न भइरहेको छ । त्यसका लागि एक हप्ताको समय दिने निर्णय गरिएको एक प्रतिनिधिले बताए । ‘कार्यसमितिमा सबैको सहमति भएकाले पदाधिकारी चयन पनि मिलेर गरौं भन्ने प्रयास हो,’ ती प्रतिनिधिले भने ।