विराटनगर । मोरङको बूढीगंगामा शनिबार राति एम्बुलेन्स दुर्घटना हुँदा २४ वर्षीय चालकको निधन भएको छ।
मोरङ ट्राफिक प्रमुख इन्स्पेक्टर राजन लम्सालका अनुसार बूढीगंगा गाउँपालिका ३ स्थित महालक्ष्मी वायरअगाडि राति करिब १० ः ४५ बजे मनमाया श्रेष्ठ स्मृति प्रतिष्ठानको को १ च ४७७४ नम्बरको एम्बुलेन्स दुर्घटना भएको हो। दुर्घटनामा उदयपुरको पञ्चावती घर भई हाल बूढीगंगा २ मा बस्दै आएका चालक आशिष राईको मृत्यु भएको छ।

दुर्घटनाको जानकारी पाउनासाथ इलाका प्रहरी कार्यालय नेमुवाबाट प्रहरी नायव निरीक्षक भुवन श्रेष्ठको नेतृत्वमा टोली घटनास्थल पुगेको थियो। प्रहरीले गम्भीर घाइते अवस्थामा रहेका चालकलाई तत्काल उद्धार गरी विराट शिक्षण अस्पताल लगेको थियो। तर अस्पताल पुर्‍याउनासाथ राति ११ ः०५ बजे चिकित्सकले उनलाई मृत घोषित गरेका थिए।
प्रारम्भिक अनुसन्धानअनुसार एम्बुलेन्स दक्षिणबाट उत्तरतर्फ तीव्र गतिमा जाँदै गर्दा अनियन्त्रित भई डिभाइडरमा ठोक्किएर दुर्घटना भएको हुनसक्ने अनुमान गरिएको छ। एम्बुलेन्स कहाँबाट कहाँ जाँदै थियो भन्ने विषयमा अनुसन्धान भइरहेको छ।
दुर्घटनामा क्षतिग्रस्त एम्बुलेन्स हाल प्रहरीको नियन्त्रणमा रहेको र घटनाबारे थप अनुसन्धान भइरहेको जनाइएको छ।