‘केही महिनाअघि विदेशबाट फर्किएकामा मात्र केस थियो । फर्किनेहरूको संख्या घटेकाले केस पनि घटेको देखिएको थियो । तर, अहिले संक्रमितको संख्या बढेको छ । यो सुरुआत मात्रै हो । केसहरू निकै नै बढनेवाला छ । परिस्थिति अझै नराम्रो हुनेवाला छ’, उनले भने ।

यसो भन्दै गर्दा अन्य धेरै केस देखिएका मुलुकजस्तै ब्राजिलमा पनि समग्र जनसंख्याको १ देखि २ प्रतिशतलाई मात्र संक्रमण देखिने अवगत गराउँदै डा भ्यानडिलिएरले नेपाल अहिले त्यो अवस्था पुगिनसकेको बताए । उनका अनुसार नेपालमा अहिले शून्य दशमलव एक प्रतिशतको हाराहारीमा मात्र संक्रमण भएको छ ।

‘यसबाट मैले के भन्न खोजको हो भने केसको संख्या बढे पनि आत्तिहाल्नुपर्ने अवस्था छैन् । अन्ततः संक्रमण हुनेको संख्या पनि समग्र जनसंख्याको तुलनामा कम नै हुनेवाला छ,’ उनले भने, ‘हाम्रो वरिपरी र अहिले टोल छिमेकमा केस देखियो भन्दैमा सबैले आत्तिनुपर्देन । किनभने सबै जना संक्रमित हुने भन्ने होइन ।’

केसको संख्या बढिरहेको र संक्रमणको जोखिम पनि बढिरहे पनि थौरै जनसंख्यालाई मात्र संक्रमण देखिने र अधिकांश व्यक्तिलाई मन्द लक्षण मात्र देखिनुका साथै घातक नहुने उनको भनाइ थियो ।

फरक प्रशङ्मा विश्व स्वास्थ्य संगठनले कोरोना रोकथाम र नियन्त्रणमा नेपाललाई विभिन्न क्षेत्रमा सहयोग गरिरहेको बताउँदै उनले सहकर्मीहरू सरकारी अधिकृतसँग हातमा हात मिलाएर काम गरिरहेको, कोरोनाको प्रतिकार्यका लागि तयारी, निगरानी र तथ्यांक संकलन गर्न, प्रयोगशालाको क्षमता र गुणस्तरमा सहयोग गरिहेको जानकारी गराए । साथै संघीय सरकारलाई नीति निर्माणमा सहयोग गर्नुका साथै प्रादेशिक सरकारसँग पनि काम गरिरहेको उनले बताए ।

कोरोना नियन्त्रण र रोकथामका लागि नेपाललाई ३ तहका सरकाबीच समन्वय र सहकार्यको चुनौती रहेको बताउँदै डा भ्यानडिलिएरले कोरोना संक्रमित र सम्पर्कमा रहेकोको कट्याक्ट ट्रेसिङमा व्यक्तिको खोजी कार्य गर्न स्थानीय सरकारको महत्वपर्ण भूमिका हुने उदाहरण प्रस्तुत गरे । साथै हाल राज्यको समग्र ध्यान कोरोना रोकथाम र नियन्त्रणमा केन्द्रित भएका बेला सुत्केरी, बालबालिका दीर्घरोगी र अन्य बिरामीका उपचारमा पनि आवश्यक व्यवस्थापन गर्न चुनौती रहेको उनको धारणा थियो ।

स्वास्थ्य सेवाको सहज सुलभ पहुँच र गुणस्तर सुधार्नुपर्ने अवस्था रहेको बताउँदै उनले कोरोना रोकथाम र नियन्त्रणमा आममानिसको व्यहार परिवर्तन गर्न पनि चुनौती रहेको विचार व्यक्त गरे । नेपालले धेरै प्रकारका प्रकोप देखेको र पुनः जीवन सुरु गर्न इच्छा शक्ति नेपालीमा रहेको उल्लेख गर्दै उनले यस्तो अवस्थामा स्यमंसेवीको सहयोग पनि लिन सक्नुपर्ने सुझाव दिए । कोरोना नियन्त्रणमा सरकारले नीजि स्वास्थ्य संस्थाको पनि सहयोग लिनुपर्ने र नीजि क्षेत्रले पनि आफ्नो स्रोता साधन र जनशक्ति परिचालन गरी सहयोग गर्नुपर्ने दायित्व पुरा गर्नुपर्ने उनको धारणा थियो । – रासस