विराटनगर । विराटनगर महानगरपालिका–५ कृषिभवन र मुनालपथमा अवस्थित किड्स भिलेज स्कुलमा चार दिने स्पोर्ट्स मिट सम्पन्न भएको छ । गत आइतबारदेखि सुरु भएको स्पोर्ट्स मिट बुधबार समापन भएको हो ।
विद्यालयले स्थापनाकालदेखि नियमित रूपमा आयोजना गर्दै आएको स्पोर्ट्स मिटमा स्कुलका सबै विद्यार्थीहरुको सहभागिता रहेको प्रिन्सिपल विजय दाहालले जानकारी दिए । उनका अनुसार यस वर्षको खेलकुदमा गणित खेल, ड्रयाग द बल, आकृति मिलाउने, खरायो दौड, कार रेसिङ, क्रिकेट, फुटबल, बाधा दौड, भ्यागुतो दौड, बोरा दौड, तीन खुट्टे दौड, धागो र सियो, टावर निर्माण र रिले जस्ता विविध खेलहरू समावेश गरिएका थिए ।विजेता विद्यार्थीहरूलाई आगामी फागुन २१ गते पुरस्कार वितरण गरिने प्रिन्सिपल दाहालको भनाइ छ ।

यस्ता खेलकुद कार्यक्रमले बालबालिकाको शारीरिक, मानसिक र सामाजिक विकासमा महत्वपूर्ण भूमिका खेल्ने उनले बताए । विद्यार्थीहरुको चौतर्फी विकासमा विद्यालयले अतिरिक्त क्रियाकलापहरुमा विशेष ध्यान दिएर अगाडी बढेको प्रिन्सिपल दाहालले बताए । उनका अनुसार यस्ता खेलहरूले बालबालिकामा टिमवर्क, नेतृत्व क्षमता, रचनात्मक सोच र समस्या समाधान गर्ने क्षमताको विकास गर्छन् ।