विराटनगर । नेपाल चिकित्सक संघ कोशी शाखाले सिएमई कार्यक्रम सम्पन्न गरेको छ । भारतको पटनास्थित मेदान्ता अस्पतालको सहयोगमा उक्त कार्यक्रम शनिबार आयोजना गरेको हो ।
विशेषज्ञ चिकित्सकहरुले अनुभव र शोघहरु प्रस्तुत गरेर अन्य विशेषज्ञ चिकित्सकहरुको चिकित्सकिय सीप र ज्ञान कायम राख्न तथा अभिबृद्धि गर्न एवं चिकित्सा क्षेत्रमा नयाँ विकासहरू बारे जान्न सिएमई (कन्टिन्यु मेडिकल एजुकेसन) मद्दत गर्ने भएकाले कार्यक्रम आयोजना गरेको संघका महासचिव डा. बालकृष्ण साहले बताए ।

मुटु, क्यान्सर र न्युरो गरि ३ कार्यपत्रहरु प्रस्तुत गरिएको सो सिएमई कार्यक्रममा अध्यक्षता गरेको संघको साईन्टिफिक समितिका चियरमेन प्रोफेसर डा. शान्ति सुवेदीले सबैलाई स्वागत गर्दै विमारीहरुलाई उच्चतम सेवा दिन सिकाई कहिले नसकिने विचार राखेका थिए ।
भारतको मेदान्ता हर्ट ईन्स्टिच्युटका निर्देशक द्वय डा. प्रमोद कुमार र डा. अजय कुमार सिन्हाले मृटुका समस्या तथा एन्जियोप्लास्टी सम्बन्धि कार्यपत्र प्रस्तुत गरेका थिए । सो प्रस्तुतिमा नोवेल अस्पतालका प्रोफेसर डा. राजेश नेपाल र संघका सल्लाहकार डा. नारायण कुमारले सहजिकरण गरेका थिए ।
त्यस्तै मेदान्ता क्यान्सर ईन्स्टिच्युट पटनाका सहनिर्देशक डा. सन्दिप कुमारले प्यान्क्रियाजमा हुने क्यान्सरका शल्यक्रिया सम्बन्धि कार्यपत्र प्रस्तुत गरेका थिए । यस प्रस्तुतिमा विराट मेडिकल कलेजका एसिस्टेन्ट प्रोफेसर डा.शिवराज शर्मा र नोवेल मेडिकल कलेजका डा. प्रदिप भण्डारीले सहजिकरण गरेका थिए ।
तेस्रो प्रस्तुति नोवेल मेडिकल कलेजका प्रोफेसर डा. प्रकाश काफ्लेले मष्तिकको एन्युरिजमका उपचार सम्बन्धि गरेका थिए । सो प्रस्तुतिमा न्युरो–कार्डियो तथा मल्टिडिसिप्लेनरी अस्पतालका डा. यम बहादुर रोक्का र आर्या न्युरो अस्पतालका डा. पंकज नेपालले सहजिकरण गरेका थिए ।
करिब १ सय ५० चिकित्सकहरुको उपस्थिति रहेको थियो । सहभागी चिकित्सकहरु, सहजकर्ता तथा मेदान्ता अस्पताललाई समेत धन्यवाद दिदै संघका अध्यक्ष डा. राजेन्द्र चौधरीले चिकित्सकहरुको हक हित र ज्ञान अभिवृद्धिका लागि संघ जहिल्यै पनि खुल्ला रहेको बताउदै कार्यक्रम समापन गरेका थिए ।
त्यसैगरी नेपाल औषधी व्यवसायी संघ मोरङ शाखाले पनि मुटु सम्बन्धी सचेता कार्यक्रम आयोजना गरेको छ । मेदान्ता अस्पतालसँगको सहकार्यमा उक्त कार्यक्रम आयोजना गरेको संघका अध्यक्ष देशबन्धु ढकालले जानकारी दिए । उक्त कार्यक्रममा औषधी व्यवसायी, विद्यार्थी, स्वयमसेविकाहरुको सहभागिता रहेको थियो ।