विराटनगर । जनता आदर्श बहुमुखी क्याम्पसले सामाजिक कार्यमा स्नातक र स्नातकोत्तर तहमा अध्ययन गर्ने विद्यार्थीहरूलाई साइवर अपराध सम्बन्धी दुई दिने तालिम दिएको छ । प्रविधिमा आएको विकासका कारण पछिल्लो समयमा बढ्दै गएको साइवर अपराधबाट विद्यार्थी र समाजलाई जोगाउने र यसको प्रभावलाई कमगर्ने उद्देश्यले क्याम्पसले तालिमको आयोजना गरेको हो ।

कोशी प्रदेश प्रहरी तालिम केन्द्र विराटनगरका प्रहरी निरीक्षक गुरू प्रसाद तिम्सिनाले साइवर अपराधको प्रभाव, यसको जोखिम, अनुसन्धान प्रकृया, कानूनी उपचार, बच्ने उपाय लगायत साइवर अपराधका बहुआयामिक पक्षका विषयमा प्रशिक्षण दिनुभयो । प्रशिक्षक तिम्सिनाले साइवर सुरक्षा सम्बन्धी भारतमा तालिम लिनु भएको छ । महिला र वालवालिका विरूद्ध हुने साइवर अपराध तथा अपराध अनुसन्धानमा लामो अनुभव भएको विज्ञ प्रशिक्षक हुनुहुन्छ, तिम्सिना ।

सामाजिक कार्यका व्यवहारिक विषय भएकाले क्याम्पसले विभिन्न विषयका विज्ञ प्रशिक्षकलाई अतिथी प्राध्यापकका रुपमा ल्याएर विद्यार्थीहरूलाई प्रशिक्षण दिँदै आएको छ । प्रशिक्षण कार्यक्रममा एम. एस. डब्ल्यु. तेसो सेमेष्टर, बी. एस. डब्ल्यु दोस्रो, तेस्रो, पाँचौं र छैठौं सेमेष्टरका विद्यार्थीहरूको सहभागिता थियो । पूर्वाञ्चल विश्वविद्यालयको आंगिक क्याम्पस जनता आदर्श बहुमुखी क्याम्पसले सामाजिक कार्य अन्तर्गत बी. एस. डब्ल्यु र एम. एस. डब्ल्यु अध्यापन गर्दै आएको छ ।