काठमाण्डौं । स्वास्थ्य बीमा बोर्डले विराटनगरस्थित लाइफगार्ड अस्पतालको ‘स्वास्थ्य बीमा कार्यक्रम’ स्थगन गरेको छ । ३२ जेठ शुक्रबारदेखि लागू हुने गरी तीन महिनासम्मको लागि स्वास्थ्य बीमा कार्यक्रम सेवा स्थगन गरेको हो ।

लाइफगार्ड अस्पतालका चिकित्सकले विरामीसँग दोहोरो रकम लिएको पाइएपछि स्वास्थ्य बीमा बोर्डले बीमा कार्यक्रम शुक्रबार राती १२ बजेदेखि लागू हुने गरी तीन महिनाको लागि स्थगन गरेको स्वास्थ्य बीमा बोर्डका अध्यक्ष डा. गुणराज लोहनीले जानकारी दिए ।

चिकित्सकले अप्रेसनको नाममा विरामीसँग दोहोरो रकम लिएको समचार प्रशाति भएपछि स्वास्थ्य बीमा बोर्डले चार सदस्यीय छानविन समिति गठन गरेको थियो । गठित समिति विराटनगरमा आएर छानविन समेर बिहीबार काठमाण्डौ फर्किएको थियो । उक्त समितिले बुझाएको प्रतिवेदनको आधारमा बीमा कार्यक्रममा कैफियत देखिएपछि तत्काल लाइफगार्डमा स्वास्थ्य बीमा कार्यक्रम स्थगन गरिएको उनले बताए ।

‘स्वास्थ्य वीमामा आवद्ध नागरिकको उपचार गर्दा बिरामीसँग छुट्टै रकम असुल गरेको लगायतका अन्य विषयहरूमा विभिन्न सञ्चार माध्यममा प्रकाशित समाचार, हेलो सरकारबाट गुनासो, व्यक्तिगतरूपमा गुनासो र सोही विषयमा अख्तियार दुरुपयोग अनुसन्धान आयोगको कार्यालय इटहरीबाट समेत पत्रका सम्बन्धमा तहाँ अस्पतालमा अनुगमन तथा छानविन गर्न गठित समितिले स्थलगत अध्ययनकै क्रममा इमेल मार्फत पठाएको प्रारम्भिक प्रतिवेदनमा शंकास्पद विवरण पेश गरी भुक्तानी लिएको देखिएकोले स्वास्थ्य बीमा नियमावली, २०७५ को नियम १९ (ख) बमोजिमको कसुर हुने कार्य गरेको पाईएको हुनाले मिति २०८१।०२।३२ गते देखि लागु हुने गरी सोही नियमावलीको नियम १९(३) बमोजिम हाललाई तीन महिना स्वास्थ्य बीमा कार्यक्रम सेवा स्थगन गरिएको छ,’ स्वास्थ्य बीमा बोर्डले काटेको पत्रमा उल्लेखछ ।

शुक्रबारसम्म भर्ना भएका विरामीको हकमा बोर्डबाट निर्णय गरी भुक्तानीमा सहजिकरण गरिने भएको छ ।
लाइफगार्डमा तीन वर्ष अगाडीदेखि स्वास्थ्य बीमा कार्यक्रम सुरु भएको थियो । यस अस्पताललमा दैनिक १ सय जनाले स्वास्थ्य बीमा कार्यक्रम मार्फत सेवा लिने गरेका छन् । एक सय जनाले स्वास्थ्य बीमा मार्फत उपचार गर्दा २ देखि पाँच जनाको दैनिक शल्यक्रिया हुने गरेको अस्पतालको अभिलेखमा देखिन्छ ।
यसअघि अस्पतालका अध्यक्ष एकबाल अहमदले प्रेस विज्ञाप्ती जारी गर्दै हस्पिटलले स्वास्थ्य बीमाको नीति, नियमअनुसार नै गुणस्तरीय उपचार सेवा बिरामीलाई प्रदान गर्दै आएको दाबी गरेको छ ।