विराटनगर । नेकपा एमालेका अध्यक्ष केपी शर्मा ओलीले सत्ता स्वार्थका लागि नेकपा एमाले कुद्ने पक्षमा तयार नभएको बताएका छन् । विराटनगर विमानस्थलमा आज संचारकर्मीहरुसँग कुराकानी गर्दै अध्यक्ष शर्माले यस्तो बताएका हुन् ।

काँग्रेसमा सत्ता भन्दा केहीमा ध्यान नभएको उनले बताए । ‘काँग्रेस प्रधानमन्त्रीले विश्वासको मत लिने कार्यक्रमलाई पनि रोक्न लाग्नु भयो । त्यसकारण उहाँहरुमा सहमति, सहकार्य, स्थिरता विकास तिर रुची छैन,’ ओलीले भने, ‘एमाले देशमा स्थिरता होस्, स्थायीत्व होस्, लोकतान्त्रिक मूल्य, मान्यता, सुशासन र विकासमा अगाडि बढौं भन्ने कुरा हो ।’

अहिलेको जटिल धेरै समस्याहरु साम्प्रदायिकताको कुरा भएको उनले बताए । ‘प्रतिगामी शक्तिहरु हौसिएका छन् । बाह्य हस्तक्षेप बढ्दो छ । यस्ता कुरालाई ध्यानमा राखेर राष्ट्रलाई एक ठाउँमा उभ्याउने, आधारभूत कुरालाई एक ठाउँमा राखेर स्वस्थ प्रतिस्पर्धा हुनुपर्छ । त्यो कुरा नेपाली काँग्रेसले बुझ्नै सकेन । उ नबुझि बुढो भयो,’ उनले भने ।