एजेन्सी, २३ कात्तिक-अमेरिकाको राष्ट्रपतिमा निर्वाचित भएपछि जो बाइडेनले पहिलो पटक देशबासीका नाममा सम्बोधन गरेका छन् । बाइडेले आइतबार देशबासीलाई सम्बोधन गर्दै आफूलाई विश्वास गरेर निर्वाचित गराएकोमा खुसी व्यक्त गर्दै आफू तोड्ने नभएर अमेरिकीलाई जोड्ने राष्ट्रपति बन्ने आश्वासन दिए ।
उनले आफू राष्ट्रपति निर्वाचित भइसकेपछि अब डेमोक्रेट राज्य र रिपब्लिकन राज्यका रुपमा नहेरी सिंगो अमेरिकालाई हेर्ने बताए । उनले सबै अमेरिकी जनताको भरोसा र विश्वास जित्ने कोशिस गर्ने पनि बताए ।
उनले आफूलाई मत नदिने मतदाताका लागि पनि उत्तिकै मेहनतका साथ काम गर्ने बताए । उनले आफूलाई राष्ट्रपतिमा निर्वाचित गराउन महत्वपूर्ण भूमिका खेल्ने अफ्रिकी–अमेरिकी मतदातालाई विशेष धन्यवाद दिए ।
उनले आफ्नो पहिलो काम कोरोना भाइरसको महामारी नियन्त्रण गर्नु रहेको पनि बताएका छन् । उनले भने, ‘सोमबार म एक टिम घोषणा गर्नेछु, जसमा शीर्ष वैज्ञानिक र विशेषज्ञले कोभिड प्लानबारे काम गर्नेछन् । यो योजना २१ जनवरी, २०२१ देखि लागू हुनेछ ।’
पहिलो महिला उपराष्ट्रपतिमा निर्वाचित कमला ह्यारिसले आफू पहिलो महिला उपराष्ट्रपति भएपनि अन्तिम नभएको बताइन् । उनले आफ्नो जितबाट देशभरका महिलामा असम्भव केही नरहेको सन्देश जाने बताइन् । उनले राष्ट्रपतिमा निर्वाचित जो बाइडेनलाई बधाई दिएकी छन् ।