विराटनगर । मोरङको तराई मधेसलाई यातायातमार्फत पूर्वपश्चिम जोड्ने लक्ष्यसहित निर्माण भइरहेको हुलाकी राजमार्गको काममालाई तिव्रता दिनुपर्ने माग नेपाली काँग्रेस कटहरी गाउँपालिकाले गरेको छ ।

उक्त सडक निमार्ण ढिलासुस्ती हुँदा सवारी दुर्घटना र आवत जावतमा सास्ती भएको भन्दै नेपाली काँग्रेस कटहरीले मोरङका प्रमुख जिल्ला अधिकारी प्रेमप्रसाद भट्टराईलाई भेटेर ज्ञापन पत्र बुझाएको छ । उनीहरुले मंगलबार ज्ञापन पत्र बुझाउँदै तिव्र रुपमा निमार्ण कार्य सुरु नगरे चैत १५ गतेदेखि चरणबद्ध आन्दोलनमा उत्रिने चेतवनी पनि दिएका छन् ।

गत साउनमा कटहरी हुलाकी मार्ग संघर्ष समिति र जिल्ला प्रशासन कार्यालयबीच निमार्ण कार्यलाई तिव्रता दिने सम्झौता भएको थियो । तर, सम्झौता अनुसार ठेकेदार कम्पनीले काम नगरेको भन्दै १५ चैत १५ गतेसम्म पनि निमार्ण कार्यलाई तिव्रता नदिए चरणबद्ध रुपमा आन्दोलनमा उत्रिने नेपाली काँग्रेस कटहरीका अध्यक्ष रामकुमार कामतले जानकारी दिए । ‘सयमै सडक नबन्दा कटहरी क्षेत्रमा धेरै दुर्घटना भएर थुप्रैले ज्यान गुमाएका छन् । धुलोले उस्तै सास्ती पाएका छन् । समयमै सडक निमार्ण गरिनुपर्ने र कामलाई तिव्रता दिनुपर्ने हामीले आवज उठाउँदै आएका छौ,’ अध्यक्ष कामतले भने ।

निमार्ण कार्य चाँडै नहुँदा मोरङ जिल्लाका ५ वटा स्थानीय तहका सर्वसाधारणका लागि वर्षौंदेखि हुलाकी सडक सास्ती बनेको छ । झापासित साँध जोडिएको मोरङको रतुवामाई नगरपालिका, सुनवर्षी नगरपालिका, रंगेली नगरपालिका, धनपालथान र कटहरी गाउँपालिका क्षेत्रका सर्वसाधारण हिउँदमा सडकको धुलो र बर्खामा हिलोसँग पौठेजोरी खेलेर दिन कटाउन बाध्य छन् ।
राष्ट्रिय गौरवको आयोजनामा पर्ने यो हुलाकी राजमार्गको काम सुस्त छ । निर्माण सुरु भएको चार वर्ष भइसक्दा पनि पुरा हुने छाँटकाँट छैन ।
निर्माण व्यवसायीको हेलचेक्र्याइँले सडक अलपत्र पर्दा सर्वसाधारणले अनेकौँ सास्ती भोग्नु परेको छ । सडक कहिले निर्माण सम्पन्न हुने हो टुँगो छैन । संघ, प्रदेश र स्थानीय सरकारले यो विषयमा खासै चासो देखाएको छैन । नागरिक दबाब परे अनुगमन गर्ने नत्र चुपचाप बस्ने प्रवृत्तिले निर्माण सुरु भएको लामो समयसम्म सडक भद्रगोल बनेको हो ।

सडक छेउका बासिन्दाहरूको घरमा बस्ने अवस्था नभएको नेपाली काँग्रेस कटहरी गाउँपालिका २ का सभापति सन्जय मण्डलले बताए । सडक निमार्णको काम सुरु नगरे चैत १५ गतेबाट सरकारी सवारी साधन हिड्न नदिने बताए । ‘अहिले घर धुलोले छपक्कै छोपेको अवस्था छ,’ उनले भने, ‘गाडी, बाइक, साइकल केही चलाउनै नमिल्ने अवस्था हुन्छ । अनि सडक हाम्रा लागि सुविधा भयो कि सास्ती ?’
२०७६ सालमा तीन वर्ष भित्र चार लेन सडक निर्माण गर्ने ठेक्का सम्झौता भए पनि अहिलेसम्म जम्मा १६ किलोमिटर कालोपत्रे भएको छ ।