विराटनगर । मोरङ जिल्ला स्तरीय वी – डिभिजन क्रिकेट प्रतियोगिता अन्तर्गतको खेलमा विराटनगरको मिल्स क्रिकेट क्लव र बेलबारी विजयी भएको छ । विराटनगरको वैजनाथ क्रिकेट मैदानमा बिहीबारबाट सुरु भएको प्रतियोगितामा मिल्सले कटहरी राइजिङ क्रिकेट क्लवलाई २ रनले पराजित गरेको हो ।
टस जितेर ब्याटिङ गरेको मिल्सले निर्धारित २० ओभरमा ९ विकेट गुमाई १ सय ११ रन बनाएको थियो । जसमा अभय कुर्मीले २४ रन पारी खेल्दा पृथ्वी सुब्बाले १८ रनको योगदान दिए । कटहरीका नितेश सहनी र राहुल मण्डलले २–२ विकेट लिए ।
१ सय १२ रनको विजयी लक्ष पछ्याएको कटहरीले निर्धारित ओभरमा ५ विकेट गुमाई १ सय ९ रन बनायो । मिसका आयुस श्रेष्ठ र रुपेश केतवालले २–२ विकेट लिए । पहिलो खेलको म्यान अफ द म्याच कटहरीका सुनिल यादव घोषित भए । उनले अविजित ५२ रनको योगदान दिएका थिए ।

दोस्रो खेलमा वेलबारी क्रिकेट क्बलले मेरिल्याण्ड क्रिकेट क्लव विराटनगरलाई ७ रनले पराजित गरेको छ । टस जितेर ब्याटिङ गरेको वेलबारीले निर्धारित २० ओभरमा ७ विकेट गुमाई १ सय १३ रन बनाएको थियो । जसमा शंकर तामाङले २५ रन बनाउँदा प्रवि खडकाले १८ रन जोडे । विराटनगरका विवेक झाले ३ विकेट लिँदा शशिशेखर झले पनि ३ विकेट लिए ।
१ सय १४ रनको विजयी लक्ष पछ्याएको विराटनगरले निर्धारित ओभरमा ९ विकेट गुमाई १ सय रन बनायो । जसमा कृष्ण देवले सर्वाधिक २९ रनको योगदान दिए । निश्चल बुढाथोकीले २–२ विकेट लिए । खेलको म्यान अफ द म्याच वेलबारीका रविन खड्का घोषित भए ।