विराटनगर । मानव सेवा आश्रमले विराटनगरमा आमा सेमिनार गर्ने भएको छ । विराटनगरस्थित आरोहण गुरुकुलमा शनिबार आमा सेमिनार आयोजना गर्ने आज पत्रकार सम्मेलन गरि जानकारी गराएको हो ।

दिउँसो २ बजेदेखि ४ बजेसम्म आयोजना हुने आमा सेमिनारमा मोरङ लगायत विभिन्न जिल्लाका चार सय जनाभन्दा बढीको सहभागिता रहने जनाइएको छ ।

सेमिनारमा मानव सेवा आश्रमका संस्थापक केन्द्रीय अध्यक्ष रामजी अधिकारी प्रमुख प्रशिक्षकको रूपमा रहनेछन् ।
मानवता, राष्ट्रियता, परोपकार, राष्ट्र प्रेम र आफूलाई जन्मदिने माता पिताको महत्व बोध गराई, प्रेम सद्भाव, करूणालाई जनजनमा पु¥याउने उद्देश्यले आमा सेमिनार आयोजना गर्न लागिएको मानव सेवा आश्रममले जनाएको छ ।

आश्रमले सकारात्मक सोच, सिर्जनशीलता, रचनात्मकता, मानवीयता र सामाजिक भावनासहितको असल, आत्मसंयमित, विवेकशील र आत्मनिर्भर बनाउने उद्देश्यले यसवर्ष देशका विभिन्न ४५ स्थानमा आमा सेमिनार आयोजना गर्ने जनाएको छ ।
आश्रमले विभिन्न कारणबाट सडकपेटी र सार्वजनिक स्थलहरूमा जीवन बिताउन बाध्य अशक्त, असहाय, अनाथ, अभिभावकविहीन, सडक आश्रित मानवहरूको उद्दार गरी परामर्श, औषधोपचार तथा पारिवारिक पुनर्मिलन गराउँदै आएको छ । सेमिनारमा १४ वर्षमुनि का बालबालिकालाई सहभागी हुन नपाउने जनाइएको छ । विस २०८२ सालसम्ममा सडक आश्रित मानवमुक्त राष्ट्र निमार्ण गर्ने परिकल्पना आश्रमको रहेको छ । आश्रमको नेपालको ४५ स्थानमा आमा सम्मेलन गर्ने लक्ष्य रहेको छ । जस अनुसार पर्सा , लमजुङ, हेटौडा , दाङ, नेपालगन्ज तथा बुटवलमा आमा सम्मेलन सम्पन्न भईसकेको छ ।