विराटनगर । मोरङ र सनुसरीमा श्रृंखलाबद्ध लुटपाट गर्ने गिरोहसहितको पाँच जनाको समूह पुर्पक्षको लागि कारागार चलान भएका छन् । मोरङ अदालतले शुक्रबार सुनसरी र मोरङमा श्रृंखलाबद्ध लुटपाट गर्ने पाँच जनाको समूहलाई पुर्पक्षको लागि थुनामा राख्ने आदेश गरेको हो ।

अदालतको आदेशपछि मोरङ बुढिगंगा गाउँपालिका ५ का बर्ष २४ का म.नजरूल मियाँ सोही ठाउँका ४० वर्षिय रिजवान मियाँ, सुनसरी दुहवी नगरपालिका – १ बस्ने बर्ष ३१ का मोहमद अलि मुरताजा मियाँ, ३० वर्षिय नजरूल मियाँ र दुहवी नगरपालिका ६ का बर्ष ४० का मो. आलम पुर्पक्षको लागि कारागार चलान भएको मोरङ अदालतले जानकारी दिएको छ ।

कारागार चलान भएका समूहले भदौ २ गतेदेखि २२ गतेसम्म मोरङ र सुनसरीमा श्रृंखलाबद्ध लुटपाट गरेका थिए । विशेष प्रहरी परिचान गरेर उनीहरुलाई भदौ २२ गते ७ जनालाई मोरङ प्रहरीले नियन्त्रणमा लिएको थियो । नियन्त्रणमा लिएको मध्ये एक जना नाबलक रहेका थिए भने ३० वर्षिय सिजाम आलमलाई अदालतले १ लाख धरौटी तोकेको छ । प्रहरीले रिजवान मियाँ र नजरूल मियाको घरमा लुकाई छिपाई राखेको अवस्थामा कटुवा पेस्तोल थान–१, प्रहरीबाट लुटिएको चाईनिज पेस्तोल थान–१, मोवाईल फोन थान १६, मेमोरीकार्ड थान १२, नेपाली नगद १ लाख ७५ हजार २ सय पचहत्तर, भारतीय नगद ११ हजार ६ सय र मोटरसाईकल थान–२ समेत बरामद भएको थियो ।

प्रहरीले उनीहरुलाई डाँका चोरी र संगठित अपराध मुद्दा चलाएको थियो । जेल गएका समूहले सुनसरीमा डियुटिमा खटिएको प्रहरीको पेस्तोल र म्यागजिनबाट फायरिङ नभएपछि लुटेर समूहले आक्रमण गरेर उनीहरूको हतियार लुटेका थिए । सुनसरीको दक्षिण क्षेत्रमा चोरी तस्करी बढेपछि केही दिनयतादेखि विशेष अप्रेसनमा प्रहरी सादा पोशकमा खटिने गरेका थिए । सीमावर्ती क्षेत्रमा हतियार देखाएर लुटपाट गर्ने समूह सक्रिय रहेको सूचनाका आधारमा त्यस सम्बन्धित सूचना संकलन गर्न प्रहरी जवान बिमन परियार र प्रेम चौधरीलाई प्रहरीले खटाएको थियो । उनीहरुको साथबाट साढे १२ बजे बर्जु गाउँपालिका १ शुक्रबारेबाट कुटपिट गरी हातहतियार लुटेर लगेका थिए । प्रहरीले बोकेको हतियारबाट फायरिङ नभएपछि पेस्तोल र गोली लुटेर लगेका थिए ।